زاخۆ و جەوییە د كۆپیتكا یاریێن ڤێ گەڕێ دانە و دهۆك دێ بزاڤێن بەردەوامیا سەركەفتنان كەت
ئەڤرۆ
چاڤەڕێ دهێتە كرن سوبەهی و ئەینیا بهێت یاریێن گەڕا 18ێ ژ هەڤڕكیێن خولا پلا نایابا ئیراقێ یا تەپا پێی بهێنە ئەنجامدان، یانەیێن دهۆك و هەولێرێ دێ ژ دەرڤەیی یاریگەها خوە بەرانبەر حدوود و نەجەف بن و زاخۆ بهێزترین یاری دا دێ جەویە مێڤان كەت و تەلەبە دێ بیتە مێڤانا نەوروز.
سوبەهی دەمژمێر چارێ ئێڤاری یاریگەها شەعب ل باژێرێ بەغدا دێ مێڤانداریا یانەیا دهۆك و حدوود كەت، ئەلهۆیێن چیا دەمەكێ باش دەرباز دكەت تایبەت پشتی ئاست و ئەنجامێن سەركەفتی شیایە ب30 خالان رێزا شەشێ بهێت، ژلایێ خوەڤی یانەیا حدوود تیمەكا ب سانەهی نابیت ئەوا 22 خال كۆمكرین و رێزا 11ێ دهێت دێ بزاڤێ كەت ب ئەنجامێ باش مێڤانا خوە خوسارەت بكەت، دیدارێن هەردو تیما پێنچ جاران دهۆكێ سەركەفتن ئینایە دو جاران خوسارەتی و وەكهەڤیەك هاتیە، ژلایێ خوەڤە یانەیا هەولێر دێ بیتە مێڤانا یانەیا نەجەف د یاریەكا گرنگ دا، هەولێر ب15 خالان رێزا17ێ دهێت د رێزبەندیا مەترسیدار دایە، ژلایێ خوەڤە نەجەف خودانا 26 خالان رێزا حەفتێ دهێت، ژ یاریێن دی یێن سوبەهی، شورتە- نەفت میسان، دیوانیە- كارەبا، نەفت وەسەت- ئەلقاسم.
بڕیارە ئەینیا بهێت پێنچ یاریێن مایی ژ خولێ بهێنە ئەنجامدان، یانەیا زاخۆ بهێزترین یاریێن ڤێ گەڕێ ل دەمژمێر 4:15 دێ مێڤانداریا یانەیا جەویە خودانا سەرێ لیستێ ب35 خالان كەت، زاخۆ ب 21 خالان رێزا 12ێ دهێت، پشتی هاتنا راهێنەرێ زاخۆ حەیدەر عەبدولئەمیر تیما شیایە ژ پێنچ یاریان چار سەركەفتن و ئێك وەكهەڤی بینن ئانكۆ خوە ب تیمەكا رێكخستی و بهێز نیشان دایە، ئەڤ یاریە دێ دناڤ ئەرد و جەماوەرێ وێ دا بیت، ژ یاریێن دی یێن رۆژا ئەینی، نەوروز ل یاریگەها شەهید فرانسۆ حەریری مێڤانداریا تەلەبە كەت، هەروەسان كەرخ- زەورا، سیناعە- نەفت بەسرا، كەربەلا – نەفت.
