زاخۆ ڕه‌دكر راهێنه‌رێ خوه ب گوهۆریت
ئه‌ڤرۆ، عه‌لی حاجی:
د داخویانیه‌كێ دا ئه‌ندامێ ده‌سته‌كا كارگێریا یانا زاخۆ یا وه‌رزشی دیاركر ب چو ره‌نگان ده‌ست ژ راهێنه‌رێ خوه یێ تیما ته‌پاپێی یا خولا پلا نایابا ئیراقێ دا نا به‌رده‌ن و هه‌تا نوكه ژ ئاستێ تیما خوه د رازینه و دێ به‌رده‌وامبیت ل سه‌ر كارێ خوه ژبه‌ركو د نوكه دا ده‌م نه یێ گۆنجایه.
زێده‌تر تاها عه‌بدولحه‌كیم بۆ رۆژناما ئه‌ڤرۆ گوت: سه‌رباری وه‌كهه‌ڤیا یاریا بوری ل گه‌ل مینا یا به‌سرایی بێ گۆل لێ ب شێوه‌كێ گشتی ئاست و ئه‌نجامێن تیما مه د رازینه و پێدڤی ناكه‌ت راهێنه‌رێ خوه عه‌بدولوه‌هاب ئه‌بولهێل دووربێخین و رێزبه‌ندیا مه ل شه‌شێ د ناڤ لیستا خولا پلا نایابا ئیراقێ دا و ل سه‌رجه‌مێ 20 یانا به‌لگه‌یه ئه‌م تیمه‌كا بهێزن و هه‌ڤڕكین، له‌ورا د نوكه‌دا چو ره‌نگان هزر ژ دوورخستنا وی ناكه‌ین و هه‌كه ئه‌و ده‌م ژی هات دڤێت باشتر په‌یدا بكه‌ین و هه‌تا نوكه راهێنه‌ر یێ سه‌ركه‌فتی یه و چو پێرابوونا هه‌مبه‌ری وی و یاریزانا نا وه‌رگرین.
ژلایه‌كێ دووڤه ناڤهاتی ئه‌وچه‌نده ژی دیاركر ژ ده‌ستدانا دو خالان ل یاریا گه‌ل مینا بتنێ نه‌بوونا چه‌نسی بوو ژبه‌ركو هه‌موو یاریزانا هێرشێن مه‌ترسی لسه‌ر گۆلا وان د برن و زێده‌تری حه‌فت ده‌لیڤێن گۆلكرنێ هاتنه ژ ده‌ستدان و هه‌ر ژ خوله‌كا ده‌ستپێكێ هه‌تا دووماهیا فیركا دادڤانی بزاڤێن گۆلكرنێ نه راوه‌ستیان و تیما مینا ئێك ژ یانێن به‌رنیاس یێن ئیراقێ سه‌رباری جهێ وێ یێ خراب كو به‌ری دووماهیێ یه هاتبوو شه‌ڕی بۆ ده‌ستڤه ئینانا خالێن یاریێ ژبۆ خوه قۆرتالكرنێ و پاشڤه‌چوون بۆ پلا ئێكێ ئه‌ڤچا یاریه‌كا بشێوێ به‌ره‌ڤانی دكر و هه‌موو رێك دگرتن و گۆلپارێزێ وان تیما خوه ژ خوساره‌تیێ قۆرتالكر، له‌ورا وه‌كو ئاستێ یاریزانا و پلانێن راهێنه‌ری سه‌ركه‌فتی بوون بتنێ ب تۆماركرنا گۆلان بێ به‌هربووین.
تاها عه‌یدولحه‌كیم پشته‌ڤانیا كارگێریا یانێ بۆ كادرێ راهێنانێ و یاریزانان دیاركر و گوت: گرنگه ئه‌م به‌رده‌وامیێ بده‌ینه پشته‌ڤانیێ بۆ كادرێ راهێنانێ و یاریزانێن خوه ژبه‌ركو یاریێن بهێز ماینه و دڤێت ئه‌م رێزبه‌ندیا خوه پارێزیت و هزر د رێزێن باشتر دابكه‌ین سه‌رباری ده‌ستڤه‌ئینانا رێزێن ئێكێ بزه‌حمه‌ته لێ هیڤی و ئارمانجێن مه د مه‌زنن بۆ بلندكرنا ناڤێ زاخۆ د خولا ئیراقێ دا.
