زاخۆ ژی یا د ناڤ کێشەیێن دارایی دا
ژێدەرەکێ تایبەت نێزیکی ژ یانه‌یا زاخۆ یا وەرزشی بۆ رۆژناما ئەڤرۆ دیار کر یانه‌یا وان یا د ناڤ کێشەیا دارایی دا دەرباز دبیت و هەتا نوکە بتنێ مووچەیێ هەیڤەکێ دایە یاریزانێن تیما خوە.
زێدەتر وی ژێدەری گۆت ژی: ژ سەرجەمێ سێ هەیڤان بتنێ وان مووچەیەک دایە یاریزانێن تیمێن خوە ی باسکێت بۆلێ ئەوا پشکدار د خولا نایابا ئێراقێ دا و هەر دیسان یاریزانێن تیما زاخۆ د خولا نایابا کوردستانێ یا تەپا پێی دا لێ ژبەریا دو رۆژان ژ نوو مووچەیێ هەیڤا دو ب تیما خوە یا خولا ستێرێن ئێراقێ یا تەپا پێی دا و پێدڤییە د ماوەیێ چار رۆژێن دیتر مووچەیەکێ دیتر ژی ب یاریزانێن خوە دابین بكه‌ن، لێ ئیدارەیا سەربەخویا زاخۆ پشتەڤانیەکا باش ل کارگێریا یانێ دکەت و ب پشتەڤانیا ئیدارەیا سەربەخۆ ژی کێشەیێن وان دهێنە چارەسەر کرن، لێ یاریزانێن مە ژی گەلەک د هاریکارن دگەل دەستەیا کارگێریا یانێ کو سەرباری نەدانا مووچەیێ وان ژی هەر بەردەوامن ل سەر ئەنجامدانا یەکەیێن خوە یێن راهێنانان و ئەنجامێن باش ژی ب دەستخوەڤە دئینن.
هه‌روه‌سان وی ژێدەری گۆت ژی: دەستەیا کارگێریا یانێ ڤی هەلویستێ جوان یێ یاریزانێن خوە ژبیر ناکەت و ب بلند د هەلسەنگینت لێ دەستەیا کارگێریا یانێ هەمی یاریزانێن خوە پشتراست ژی کرینە مافێ چو کەسەکێ ناهێتە خوارن و دێ مافێ هەمی یاریزانان ب وان هێتە دان.
