زاخۆ ژ شەڕێ سەرێ لیتسێ دووركەفت و یارییا شەشێ یا دهۆكێ هاتە پاشئێخستن
دوهی هەڤڕكیێن گەڕا 27 ژ خولا ستێرێن ئیراقێ یا فوتبۆلێ ب دووماهی هاتن و هەڤڕكی ل سەرێ لیستێ دژوارتر لێكرییە، د بەرانبەردا یانەیا زاخۆ دووركەڤت، ژلایێ خوەڤە د بیتە پاشئێخستنا شەشێ یا یاریێن دهۆكێ و هەولێر ڤەگەڕیا سەركەفتنان.
زاخۆ ئاستەكێ لاواز و ئەنجامەكێ نە چاڤەڕێ كر
ل باژێرێ كەربەلا تیما یانەیا زاخۆ دەست ڤالا ڤەگەڕیا پشتی خوسارەتیەكا نە چاڤەڕێ كری دگەل خودانێن ئەردی كەربەلا دایی ب گۆلەكا كۆژەك د خولەكا 96ێ دا ئینایی، ئەڤ خوسارەتییە بۆ ئەگەر د نوكە دا ژ هەڤڕكییا سەرێ لیستێ دووربكەڤیت و پاشڤە بچیتە رێزا دویێ ب52 خالان ژ 15 سەركەفتنان، حەفت وەكهەڤی و پێنج خوسارەتییان، ل دووڤ یاریێن مایی و رێزبەندیێ هێشتا تیما زاخۆ هیڤیێن ڤەگەڕیانێ بۆ سەرێ لیستێ ماینە.
یارییا دهۆكێ دگەل مینا هاتە پاشئێخستن
ژبەركو تیما دهۆكێ یارییەكا دیرۆكی هەیە و چاڤ ل دەستكەفتەكی و ناسناڤەكی یە، فدراسیۆنا فوتبۆلا ئیراقێ دەلیڤە دایە ئەلهۆیێن چیا بۆ یارییا ڤێ حەفتیێ نەكەت و بهێتە پاشئێخستن پێخەمەت باشترین بەرهەڤی بۆ یارییا دویێ یا دووماهیێ و چارەنڤیس بۆ دەستڤە ئینانا ناسناڤێ كۆپا كەنداڤی، ئەوا بڕیارە دێ ل سێ شەمبییا بهێت دەمژمێر حەفتی شەڤ یاریگەها دهۆكێ یا نێڤدەولەتی هێتە كرن، بۆ زانین ئەڤ یارییە یا پاشئێختی دبیتە یا شەشێ پشتی یاریێن بەرانبەر تەلەبە ل بەغدا، دگەل شورتە ل دهۆكێ، بەرانبەر هەولێرێ ل هەولێرا پایتەخت، دگەل نەفت میسان ل دهۆكێ و دێ بیتە مێڤانا یانەیا دیالا.
هەولێر ڤەگەڕیا سەركەفتنان
پشتی ئەنجامێن لاوان و چار خوسارەتیێن ل دووڤ ئێك تیما یانەیا هەولێر ڤەگەڕیا سەركەفتنان ب ڕێیا ستێرا خوە شێركۆ كەریمی و خالێن خوە گەهاندنە هژمارەیا 35ێ و پێشڤە هاتە رێزا 11ێ، ئەڤ سەركەفتنە گەشبنییەك بۆ پشتەڤانێن كەلهە و منارە پەیداكرن بۆ ڤەگەریانا ئاست و ئەنجامێن باش.
عەلی عەبدولكەریم: سۆزێ ددەین قەرەبوویا خالان بكەین
د كۆنگرەیێ رۆژنامەڤانی دا عەلی عەبدولكەریم گۆلپارێزێ تیما یانەیا زاخۆ ئاست و ئەنجام یێ پێشبینیكری نە بوو، هەرچەندە ئەم گەشبین بووین دێ سەركەڤین و هەموو بزاڤێن مە بۆ سێ خالان بوو، لێ شێوازێ یارییا وان كو یاریزانێن وان دەم دكۆشت و خوەشی بۆ یاریێ نە هێلا كارتیكرنا خوە ل سەر یاریێ دكر، گۆلەكا نە چاڤەڕێ كری بوو، لێ ئەڤە تەپا پێی یە و هێشتا مە ئۆمێد ماینە، سۆزێ ددەینە پشتەڤانێن یانەیا زاخۆ بۆ یاریێن بهێت قەرەبوویا خالان بكەین، هێشتا یاریێن مایین و خولی یا درێژە.
بۆ زانین فدراسیۆنا فوتبۆلا ئیراقێ بڕیار دا یاریێن گەڕا 28ێ ل چارشەمبییا بهێت دەستپێبكەن، یاریێن یانەیێن كوردستانی د خولێ دا بڤی ڕەنگی نە، یانەیا زاخۆ دێ دناڤ ئەرد و جەماوەرێ خوە دا مێڤاندارییا نەفت میسان كەت، یانەیا نەفت یا بەغدایی دێ بیتە مێڤانا هەولێرێ، ل ئەینییا بهێت یانەیا نەورۆز دێ بیتە مێڤانا كەرخ یا بەغدایی، ل شەمبییا بهێت 19ێ نیسانێ یانەیا دهۆك دێ ڤەگەڕیتە خولێ و مێڤاندارییا یانەیا حدود یا بەغدایی كەت.
