زاخۆ ڤەگەڕیا سەرێ لیستێ و دهۆك بەردەوامە ل سەر پێشڤەچوونا خوە
قەیس وەیس:
ل ئەینییا بۆری هەڤڕكیێن گەڕا 26ێ ژ خولا ستێرێن ئیراقێ یا فوتبۆلێ هاتنە كرن ئەوا دلخوەشكەر بوو بۆ یانەیێن زاخۆ، دهۆك و نەورۆز، دبەرانبەر دا هەولێر بەردەوامە ل سەر ئەنجامێن خوە یێن خراب.
ئەلهۆیێن چیا تۆلێن خوە ژ زەورا ڤەكرن
د یارییەكا پری هەڤڕكی دا تیما یانەیا دهۆك شیا سەركەفتنەكا گرنگ ل سەر مێڤاندارا خوە یانەیا زەورا یا بەغدایی بینت ب دو گۆلان بەرانبەر گۆلەكێ بینت و ژ سەرێ لیستێ بینتە خار و دەلیڤێ بۆ زاخۆ چێكەت ڤەگەڕیتە سەرێ لیستێ هەروەسان تۆلێن خوە یێن قۆناغا ئێكێ ڤەكەت، دیارییا واندا ئەوا ل یاریگەها زەورا پایتەختێ ئیراقێ هاتییە كرن، هەردو گۆلێن ئەلهۆیێن چیا ژلایێ یاریزانان یێ هەلبژارتیێ ئیراقێ پیتەر گۆرگیس و كۆتیفۆری یانیك زاكێری هاتنە تۆماركرن، بڤی ئەنجامێ دهۆك رێزەكێ پێشڤە هاتە خانا حەفتێ ب كۆمكرنا 40 خالان ژ 12 سەركەفتنان، چار وەكهەڤی و پێنج خوسارەتی، بۆ زانین تیما دهۆكێ پێنچ یاریێن پاشئێخستی ماینە.
مەسعۆد میرال: ئەڤ سەركەفتنە دێ مۆرالا مە بۆ یارییا كۆپا كەنداڤی بلند كەت
د كۆنگرەیێ رۆژنامەڤانی دا مەسعۆد میرال ڕاهێنەرێ یانەیا دهۆكێ گۆت: یارییەكا ب هێز و پری هەڤڕكی دهاتە كرن، لێ یاریزانێن مە د ئاستێ بەرپرسیارەتیێ دا بوون، سەرباری دوورئێخستنا یاریزانەكێ مە ب كارتا سۆر لێ ئەم شیاین ب سەركەڤین و یا گرنگە پێخەمەت بلندكرنا مۆرالا یاریزانان بۆ یارییا بهێت ژ چارچووڤەیێ دووماهییا كۆپا كەنداڤی.
كوڕێن خابووری بوهاترین سەركەفتن ئینا
تیما یانەیا زاخۆ گرنگترین و بوهاترین سەركەفتن د وەرزێ ئەڤ سالەدا ئینا، پشتی شیایی ب دۆ گۆلێن پاقژ ل سەر مێڤانا خوە یانەیا شورتە یا بەغدایی بینت، ئەوا ب ئامادەبوونا زێدەتری 27 هزار كەسان ل یاریگەهێ و دەوروبەرێن وێ، هەردو گۆلێن كورێن خابووری ژلایێ یاریزانان یێ نایجیری دیبیۆتی ئۆگۆنا و ستێرا هەلبژارتیێ ئیراقێ ئەمجەد عتۆان هاتنە تۆماركرن، بڤێ ئەنجامێ زاخۆییان مفا ژ خوسارەتییا زەورا وەرگرت و هەڤڕكا خوە شورتە ڕاوەستاند و پێشڤە هاتە سەرێ لیستێ ب كۆمكرنا 52 خالان ژ 15 سەركەفتن، حەفت وەكهەڤی و چار خوسارەتییان.
تەلال ئەلبلۆش: شورتە ئێك ژ هەڤڕكێن مە یێن سەرێ لیستێ یە
د كۆنگرەیێ رۆژنامەڤانی دا تەلال ئەلبلۆشی ڕاهێنەرێ یانەیا زاخۆ گۆت: ئەز پیرۆزباهییا جەماوەرێ مەزن یێ یانەیا خوە دكەم و دەستخوەشییا جەنگاوەرێن تیمێ هەموو یاریزانا دكەم، سۆپاس ئەم شیاین سەركەفتنەكا گرنگ بینن و قەرەبوویا ژ دەستدانا خالێن دێربی بكەین، هێش كاروانێ خولێ درێژە و ئەم هەموو بزاڤان دكەین بۆ پاراستنا سەرێ لیستێ.
هەولێر كەفتییە د زوونا خوسارەتییان دا
ژلایێ خوەڤە تیما یانەیا هەولێر بەردەوامە ل سەر ئاست و ئەنجامێن خوە یێن خراب و بۆ حەفتییا چارێ ل دووڤ ئێك تووشی خوسارەتیێ دبیت، پشتی دڤێ گەڕێ دا نەشیایی سەركەفتنێ ل سەر مێڤانا خوە یانەیا ئەلقاسم بینت و تووشی خوسارەتیێ بووی ب گۆلەكێ بێ بەرانبەر و نەڕازیبوون دناڤ جەماوەرێ وێ دا پەیدا كرییە و پاشڤە چوویە رێزا 14 ب كۆمكرنا 32 خالان ژ نەهـ سەركەفتن، پێنج وەكهەڤی و11 خوسارەتییان.
نەورۆزێ سێ خالێن گرنگن ب دەستڤە ئینان
ژلایێ خوەڤە یانەیا نەورۆز شیا ب گۆلەكا جوان سەركەفتنێ ل سەر مێڤانا خوە یانەیا مینا یا بەسرایی بینت، گۆلا نەورۆزێ ژلایێ یاریزانێ وێ ڕاستگۆ فەریق ڤە هاتە تۆماركرن، ئەڤێ ئەنجامی مفا گەهاندنە یانەیا باژێرێ سلێمانیێ ئەوا ژ رێزا 15 پێشڤە هاتییە رێزا 12 ب كۆمكرنا 33 خالان ژ نەهـ سەركەفتن، شەش وەكهەڤی و 11 خوسارەتییان.
ئەنجامێن یاریێن دی یێن گەڕا 26ێ بڤی رەنگی نە
یانەیا تەلەبە 3-1 حدود، جەوییە 2-1 نەفت ئەلبەسرا، ئەلكەرخ 1- چنە ئەلنەجەف، نەفت میسان 2-چنە كارەبا، ئەلنەفت چنە-چنە ئەلكەرمە، دیالا 1-چنە كەربەلا
گۆلكەرێن ئەلهۆیێن چیا كینە؟
تیما دهۆكێ خوانا دەهـ یاریزانێن پشكداری د تۆماركرنا 29 گۆلان دا هەیە بڤی ڕەنگی، پیتەر گۆرگیس حەفت گۆل، پاشەنگ عەبدوللا شەش گۆل، كەریم دەرویش چار گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، سیابەند عەگید، ئیبراهیم غازی و لۆكاس هێنریك گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
كوڕێن خابووری 43 گۆل هەنە
پیشەكارێ یانەیا زاخۆ یێ بەرازیلی گۆستاڤۆ هێنریك ل سەرێ لیستا گۆلكەرێن تیما خوە دهێت ب تۆماركرنا 16 گۆلان، هەڤالێ وی و یاریزانێ هەلبژارتیێ ئیراقێ ئەمجەد عتوان ب تۆماركرنا 13 گۆلان رێزا دویێ دهێت، ناسر محەمەدو پێنج گۆل، ئەحمەد یاسین دو گۆل، دیبیۆتی ئۆگۆنا سێ گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز، پاتریك مارسێلۆ هەر ئێك گۆلەك تۆماركرینە كو سەرجەمێ گۆلێن زاخۆ بووینە 43 گۆل د خولێ دا.
دهۆكێ چەند یاریێن پاشئئێخستی ماینە؟
ئەو یاریێن هاتینە پاشئێخستن ژبەر كۆپا كەنداڤی پێنچ یاری بووینە و بڤی شێوەیی دگەل تەلەبە ل بەغدا، دگەل شورتە ل دهۆكێ، بەرانبەر هەولێرێ ل هەولێرا پایتەخت، دگەل نەفت میسان ل دهۆكێ و دێ بیتە مێڤانا یانەیا دیالا، د دیدارەكا خوە یا پێشتر دا بۆ رۆژنامەیا ئەڤرۆ ڕێڤەبەرێ تیما دهۆكێ جاسم محەمەد حاجی دیاركربوو هێشتا فدراسیۆنا فوتبۆلا ئیراقێ بۆ ماوەیێ بهێت دا چو ژڤان بۆ یاریێن پاشئێخستی نە هێتە دانان.
هەلوەستێ گشتی یێ رێزبەندییا خولێ پشتی بۆرینا 26 گەڕان بڤی رەنگی یە.
1- زاخۆ 52 خال.
2- زەورا 52 خال.
3- شورتە 50 خال، دو یاری ماینە.
4- جەوییە 44 خال.
5- تەلەبە 43 خال، یارییەك مایە.
6- ئەلقاسم 41 خال.
7- دهۆك 40 خال، پێنج یاری ماینە.
8- نەفت میسان 38 خال ئێك یاری ماییە
9- ئەلكەرخ 36 خال.
10- ئەلكەرمە 36 خال.
11- ئەلنەفت 34 خال.
12- نەورۆز 33 خال.
13- ئەلنەجەف 33 خال.
14- هەولێر 32 خال، ئێك یاری مایە.
15- كارەبا 31 خال.
16- مینا 28 خال.
17- نەفت ئەلبەسرا 23 خال، ئێك یاری مایە.
18- دیالا 18 خال، ئێك یاری مایە.
19- كەربەلا 18 خال.
20- حدود 13 خال.
لیستا 10 گۆلكەرێن پێشیێ یێن خولێ
ژلایەكێ دووڤە هەڤڕكییەكا دی هەیە ل سەر ئاستێ گۆلكەرێن خولێ دناڤبەرا یاریزانێن یانەیێن پشكدار، هەرچەندە هێرشبەرێ زاخۆ یێ بەرازیلی گۆستاڤۆ هێنریك بۆ ماوەیێ چار حەفتییان سەرێ لیستێ دهات لێ بۆ هێرشبەرێ شورتە موهەنەد عەلی هێلا ئەوێ 20 گۆل هەنە و گۆستاڤویی 16 گۆل هەنە، مەروان حسێن هێرشبەرێ نەورۆز 13 گۆل رێزا سێیێ دهێت، هەر ئێك ژ ئەمجەد عتۆان ژ زاخۆ 13 گۆل، سەیف رەشید ژ ئەلقاسم 11، عەلا عەباس ژ جەوییە 10، یوسف بن سودە ژ هەولێرێ 10 گۆل، ئەلحارس حاتم ژ ئەلقاسم نەهـ گۆل و محەمەد قاسم ژ نەجەف هەشت گۆل رێزێن چارێ هەتا دەهێ ل دووڤ ئێك دهێن.
