زاخۆ کار بۆ ئینانا یاریزانێن نوو دکەت
عەلی حاجی:
د داخویانیەکێ دا سکرتێرێ یانەیا زاخۆ یا وەرزشی بۆ رۆژنامەیا ئەڤرۆ دیار کر وان لژنەیەکا تایبەت یا دەست نیشان کرن و ئینانا یاریزانان هاتیە پێکئینان و ئەو لژنەیە کارێ خوە دکەت.
زێدەتر هشیار شەهباز گۆت : لدووڤ وێ پلانا هاتیە دارێشتن ژلایێ دەستەیا کارگێریا یانەیا زاخۆ ڤە کو پێکئینانا لژنەیەکا تایبەتە یا دەست نیشان کرن و ئینانا یاریزانایە بۆ تیما مە ژ بۆ وەرزێ نوو یێ خولا ستێرێن ئیراقێ یا تەپاپێی،بێگومان د قوناغا ئێکێ دا دێ گرێبەستا وان یاریزانان هێتە نوو کرن یێن کو ڕاهێنەرێ مە عەبدولغەنی شەهد داخازا مانا وان یاریزانان کری،د نوکە دا گرێبەستا ئالیو ئادەمی هاتیە نوو کرن ودەمەک نێزیک دا دێ گرێبەستا هندەک یاریزانێن دیتر ژی هێتە نوو کرن،د ئەڤ سالە دا گەلەک دەم ل بەر دەست نینە و دەم گەلەک کێمە ژبەر هندێ پێدڤیە ئەم ب هویری کار بکەین داکو بشێن یاریزانێن باش پەیدا بکەین و گرێبەستێ دگەل دا ئیمزا بکەین،ئەم ناخوازین تیما خوە گەلەک گوهورینان تێدا بکەین ژبەرکو ئەو چەندە د بەرژەوەندیا مە دا نینە،نێزیکی ٦٠٪ دێ یاریزانێن تیما خوە پارێزین.
ناڤبری گۆت ژی: ئەم دانوستاندنێ داینە دگەل چەندین یاریزانێن باش و پێدڤیە تیمەکا ب هێزتر ژ وەرزێ بوری دروست بکەین و بۆ وەرزێ بهێت مە ئارمانجێن مەزنتر هەنە.
بۆ زانین ل وەرزێ ئەڤ سالە تیما یانەیا زاخۆ شیا خوە بگەهینە ڕێزا سێیێ ل سەر ئاستێ خولا پلا ستێرێن ئیراقێ ب کۆمکرنا ٧٢ خالان کو دبیتە جارا ئێکێ د دیرۆکا وێ دا ڤێ هژمارا خالا کۆمڤەبکەت و بڕیارە پشکداریێ د قارەمانییەکا دەرڤە دا بکەت.
