زاخۆ گه‌شبینه ده‌ربازبیته قۆناغا پێش دووماهیا جاما ئیراقێ
ئه‌ڤرۆ، قه‌یس وه‌یس
ب دروشمێ سه‌ركه‌فتن و تۆماركرنا دیرۆكه‌كا دی یا نوو چاڤه‌ڕێ دهێته كرن ئه‌ڤرۆ ل ده‌مژمێر 4:45 ئێڤاری تیما یانا زاخۆ مێڤانداریا یانا مه‌سافی ئه‌لجنوب ل یاریگه‌ها نێڤده‌وله‌تی یا زاخۆ بكه‌ت ژ چارچووڤێ هه‌ڤڕكیێن قۆناغا هه‌شتێ یا قاره‌مانیا جاما ئیراقێ یا ته‌پا پێی ئه‌وا دێ ب به‌رهه‌ڤبوونا جه‌ماوه‌رێ یانێ بیت پشتی بۆ ماوێ زێده‌تری هه‌یڤه‌كێ ژ دووركه‌فتنێ ده‌رئه‌نجامێن سزایێن ئێكه‌تیا ته‌پا پێی یا ئیراقێ ل سه‌ر یانا زاخۆ هاتیه ده‌ركرن.
د ڤێ یاریێ دا داخوازی دهێنه كرن كو دوور ژ ئه‌نجامێ یاریێ دڤێت جه‌ماوه‌رێ وه‌رزشی یێ زاخۆ روویێ خوه یێ راسته‌قینه نیشان بده‌ن كو پشته‌ڤانیه‌كا مه‌زن و جوان وه‌كو هه‌رجار ل تیما خوه بكه‌ن دوور ژ تۆند وتیژیا دناڤ یاریگه‌هێ دا ئه‌وا دهێته پێشبینیكری هژماره‌كا مه‌زن یا جه‌ماوه‌ری ل یاریگه‌هێ ئاماده‌بن.
ل دور ڤێ یاریێ بیلال ئه‌لمسری هاریكارێ راهێنه‌رێ تیما زاخۆ هیڤی خواست بشێن دلێ جه‌ماوه‌ری خۆشكه‌ن و بیته دووماهی ئه‌نجامێن لاوزا و گۆت: ئه‌ڤ یاریه گه‌له‌ك یا گرنگه و به‌رهه‌ڤیێن باش مه بو كرینه پێخه‌مه‌ت باشترین شێوه ب هێنه د ناڤ یاریێ دا، ڤه‌گه‌ڕیانا جه‌ماوه‌ری بۆ یاریگه‌هێ دێ هێزه‌كا مه‌زن ده‌ته یاریێ له‌ورا گه‌شبینن دێ دیرۆكه‌كا دی تۆماربكه‌ین تیما خوه به‌ر ب قۆناغا پێش دووماهیا قاره‌مانیێ به‌ین، رژدین باشترین ئاست و ئه‌نجام بینن لێ هه‌موو یاریزان دێ لبن هۆشداریێ دابن ژبه‌ركو تیما مێڤان ژی هیڤیێن سه‌ركه‌فتنێ هه‌نه و نابیت سڤكاتیێ ب تیما مه‌سافی ئه‌لجنوب بكه‌ین.
ژ یاریێن دی یێن ئه‌ڤرۆ و د هه‌مان ده‌مژمێر دا نوونه‌را پایته‌ختێ كوردستانێ یانا هه‌ولێر دێ ل باژێرێ به‌غدا بیته مێڤانا یانا كه‌رخ، ل ده‌مژمێر هه‌شتی شه‌ڤ یاریگه‌ها شه‌عب دێ مێڤانداریا زه‌ورا و جه‌ویه كه‌ت.
