زارۆك و تەكنۆلۆژیا
جوان ئەحمەد
د ڤی سەردەمی دا تەكنولۆجیایێ كاریگەریەكا مەزن ل سەر ژیانا زارۆكان كریە ب رێكا ئامیرە و یاریێن ئەلیكترونی، ژ ئەگەرێ ڤێ چەندێ ژی ئاستێ زارۆكان وەكو قوتابی د قوتابخانان دا و د ناڤ جڤاكی دا وەكو كەسەكێ ئاسایی ب شێوەیەكێ بەرچاڤ لاوازكریە، ژ بەر كو كارتێكرنا ڤێ تەكنولۆجیایێ و هندەك یاریان رەنگڤەدانەكا راستەوخۆ ل سەر مەژی و لڤینێن زارۆكان كریە و ئاگەه ژ ژیانا خۆ یا رۆژانە و لڤینێن خۆ نەماینە، زێدەتر ژی ئەڤ بەرپرسیارەتی و خەمساریا پلە ئێك دكەڤیتە سەر ملێن دایك و باب و سەمیانێن زارۆكان.
د نوكە دا و پشتی وەرزێ بێهنڤەدانا قوتابخانێ دەستپێكری دڤێت هەمی دایك و باب زارۆكێ خۆ ئامادە بكن بۆ وەرزێن بهێت و دێ ل ڤێرێ هندەك بۆچوون و ئامۆژگاریان دەینە دیاركرن:
1- ل سەر هەر دایك و بابەكێ و سەمیانێن زارۆیان پێدڤیە چاڤدێریا زارۆكێن خۆ بكەن، د دەمێ مژویلی مۆبایل و یاریێن ئەلیكترۆنی ڤە، ئەرێ ئەڤ زارۆكە تەماشەی چ دكەن و مژویلی چ جۆرێ یاریانن، ژ نێزیك ڤە هایداری وان بن.
2- یا باشتر ئەوە دایك و باب چەند دەمژمێرێن سنوورداركری تەرخان بكەن بۆ زارۆكێن خۆ ل دەمێ بكارئینانا ئامیرەیێن ئایپاد و مۆبایل و كۆمپیوتەری، چونكو نۆشدار شیرەتێ دكەن زێدە بكارئینانا ڤان ئامیرەیان كارتێكرنێ ل مێشك و چاڤ و لڤین و نڤستن و ساخلەمیا زارۆكان دكەن.
3-دڤێت هندەك جاران دایك و باب هەول بدەن زارۆكێن خۆ ب هندەك تشتێن ب مفا ڤە مژویل بكەن ل مالێ وەك كارێن دەستی یان ژی ڤرێكەن خولێن (مەلەڤانی، زمانان، وەرزشی، خواندنا پەرتوكان و هتد..).
4- گرنگە سەمیانێن زارۆكان چەندەك ژ دەمێ خۆ بۆ زارۆكێن خۆ تەرخان بكەن و سەرەدانا ژۆرێن وان بكەن داكو زارۆك هەست بتنێ بوونێ نەكەن و بزانن كو دایك و بابێن وان ئاگەهـ ژ هەر رەفتارەكا وان یا باش و خراب هەنە.
لەورا بۆ ئاڤاكرنا كەسایەتیا ساخلەم، گرنگ و پێدڤییە جڤاكێ مە باشتر رۆلێ خۆ د پەروەردەیا زارۆكێن خۆ دا بگێرن و نەهێلن تەكنولۆجیا و ئینتەرنێت ژیانا زارۆكان بێختە بەر گەفێن هەڕفاندنێ.
