زارۆیێ خوە ژ نەخۆشیێن زڤستانێ بپارێزە
ئەڤرۆ نيوز:
نەخۆشیێن سەرمایێ و پەرسیڤ ژ ھەموو نەخۆشیان ل وەرزێ زڤستانێ بەربەلاڤترن، و ژ ھەموو نەخۆشیان پتر مرۆڤی پوسیدە دکەن و زارۆ بەری مەزنان تووش دبنێ و چو رێیێن زانستی نینن بۆ بەرسینگگرتنا وان نەخۆشیان، بەلێ ھندەک رێ ھەنە رێ لێ دگرن و پەیدا بوونا وان کێم دکەن.
ب ڤان رێیان زارۆیێ خوە ژ وان نەخۆشیان بپارێزە:
سەبارەت زارۆیێن شیرخۆر، شیردانا سروشتی باشترین و سەرکەفتیترین رێیە بۆ پاراستنا زارۆیێن شیرخۆر، دیسان بۆ بھێزکرنا بەرھنگاریا وان بۆ نەخۆشیان چونکو بەرھنگاریا دایکێ ب رێیا شیری بۆ زارۆی دھێتە ڤەگوھاستن.
بۆ زارۆێن مەزنتر ژی خوەپاراستن بۆ وان ژ خوارنێ دەستپێدکەت، خوارنەکا ساخلەم و ھەڤسەنگ ژ ڤیتامین و کانزایێن پێدڤی بۆ ئاڤاکرنا بەرھنگاریا لەشی و پاراستنا ساخلەمیا وان بۆ بەرھنگاریا نەخۆشیان، ل گەل ڤێ چەندێ ژی قەبارەکێ زێدە یێ زەرزەواتی و فێقی بدە زارۆیێ خوە چونکو ئەو باشترین دەرمانە بۆ پاراستنا وان.
باش چاڤدێریا سەقایێ مالا خوە بکە و بلا ھەردەم بایێ ناڤمالێ یێ نوو بیت، چونکو جھێن گرتی باشترین ژینگەھە بۆ پربوونا میکرۆبان، پەنجەرکان ڤەکە بلا ھەردەم بایێ ناڤمالێ بھێتە گوھۆرین.
بەردەوام دەستێن زارۆیێ خوە بشۆ، پشتی خوارنێ و پشتێ یاریان و پشتی چوونا دەستاڤێ و دەمێ زارۆیێ تە دەست دکەتە یاریێن زارۆیێن دی، لەورا پێدڤی تو زارۆیێ خوە فێری دەست شووشتنێ بکەی.
جگارەکێشان ل ناڤمالێ زارۆی تووشی بێھنتەنگیێ و نەخۆشیێن دفنێ و گەریێ و گوھی دکەت، لەورا باشترە جگارە د ژوور ڤە نەھێنە کێشان.
بلا پلا گەرماتیا ناڤمالێ یا راگرتی بیت، چونکو پلا گەرماتیا بلند گەریا زارۆی تووشی ھەودانێ دکەت، لەورا یا باش ئەوە گەرماتیا ناڤمالێ یا ناڤنجی بیت.
دەمێ تو سەرێ زارۆیێ خوە دشۆی تو دشێی سەرشوویێ گەرم بکەی لێ گەرمەکا ناڤنجی، چونکو پشتی دەردکەڤیت و دچیتە جھەکێ سار دێ تووشی نەخۆشیان بیت.
نەھێلە زارۆیێ تە تێکەلیا چو کەسێن نەخۆش بکەت و بتایبەت زارۆیێن ژ نوو ژدایکبووی و نەھێلە زارۆیێ ژنوو ژدایکبووی ماچی بکەت
