زارۆیەك دشێت خێزانێ هەمیێ تووشی ئەنفلوەنزایێ بكەت
بەرپەرێ ساخلەمیێ:
د.نزار بكر، شیرەتكارێ نەخۆشیێن زارۆكان دیاركر كو دەمێ دونیا سار دبیت و پلێن گەرماتیێ دهێنە خوارێ، هندەك نەخۆشی بەربەلاف دبن، ژوانژی “ پەرسیڤ، كولبوونا بەلاعیما، كولبوونا سینگی و نەخۆشیێن هەستداریێ وەكو رەبوویێ“ گەلەك زێدەدبن، بەرامبەر وێ چەندێ ژی هندەك نەخۆشی بەر ب كێمبوونێ دچن وەكو “ دلرابوون، زكچوون، ئێشانا زكی و هشكبوون” و گۆت: ئەگەرێن وان نەخۆشیا پتریا وان ڤایرۆسن، بەلێ هندەك جارانژی بەكتریا ژی دگەلدانە و دڤێت مە ئاگەهـ لێ هەبیت.
ئەگەرێن تووشبوونا زارۆكان ب شێوەكێ بەرفرەهـ ڤەدگەرن بوو خەلكی ژی كو دەمێ دونیا بەر ب ساربوونێ دچیت، هەلبەت ڤایرۆسێن سەرمایێ مشە دبن، بەلێ دڤێت مرۆڤ خۆ بپارێزیت.
بەرفرەهیا وێ د جڤاكێ مەدا، دزڤریت بۆ تێكەلیا زێدە، ئەڤجا چ ژباخچا و قوتابخانا و دیسان سەرەدانێن مالا و جهێن كۆمڤەبوونا خەلكی وەكو مۆل و بازار كو ژبەر تێكەلیا زێدە ل وان جهان ڤایرۆس دهێتە ڤەگوهاستن و گۆت: پتریا وان ب رێكا بێهنژین و كوخكێ ل نێزیك ئێك تووش دبن.
و هەكە ب تنێ زارۆكەك ل باخچەی یان قوتابخانێ تووشی نەخۆشیێن نوكە ببیت و بهێتە مال دێ مالێ هەمیا نەخۆش كەت و دڤێت دایبابان ئاگەهـ ل زارۆكێن خۆ هەبیت و رێكێن سەرەدەریێ بزانن كو ڤایرۆس نەهێتە ڤەگۆهاستن.
دەربارەی رێكێن خۆپاڕاستنێ ژی، د.نزار بكر دیاركر، گەلەك رێك و فاكتەر یێن هەین ئەڤ ڤایرۆسە كێمتر بهێتە ڤەگوهاستن، ژوانژی، هەكە زارۆك د سالا ئێكێ دا بیت، پێدڤیە دایك شیرێ خۆ بدەتێ، چونكو شیردانا سرۆشتی باشترین رێكە بۆ بهێزكرنا بەرگریا لەشێ زارۆكی و ناهێلیت زارۆك تووشی نەخۆشیێن زڤستانێ ببیت، هەروەسا هەكە شیرێ قودیكا بدەتێ دڤێت باش و پاقژ بوو ئامادەبكەت و هەكە دایك تووشی پەرسیڤێ ببیت، بەری زارۆكی راكەت دڤێت دەستێن خۆ باش بشووت و ماسكێ بكاربینیت و پاش شیری بدەتە زارۆكی و هەكە دیت زارۆكێ وێ یێ نەخۆشە پێدڤیە نەفرێكەتە باخچەی یان قوتابخانێ، چونكو دێ بیتە ئەگەر گەلەك زارۆكێن دی تووش بكەت.
هەروەسا دیاركر كو خوارن و ڤەخوارنێن ساخلەم گەلەك د گرنگن بۆ زارۆكی، دیسا پلا گەرماتیێ دناڤبەرا مالێ و دەرڤە دڤێت گەلەك نەبیت، هندەك دێ مالێ گەلەك ژ رادێ سرۆشتی گەرم كەن، لەورا دەمێ دچیتە ژدەرڤە گەلەك یا كێمە و ئێكسەر دێ نەساخ بیت، هەروەسا زارۆكی تێبگەهینیت گەلەك شلەمەنیا وەكو سۆب و شوربە و شیر و فێقی باش بخۆت و تشتێن دوكانێ كێم بكەت و زوی ب زوی دەستێن خۆ نەكەتە جهێن نەپێدڤی و ل دەمێ كوخك و بێهنژینێ كلینسا ب كاربینیت.
د.نزار بكر دیاركر ئەو زارۆكێن بەری دەمی یان تازە بووین و ئەوێن ل ژێر شەش هەیڤیێ دا و دیسا زارۆكێن دلێ وان یێ دروست نەبیت، یان سیستەمێ بەرگریا وان گەلەكێ بهێزنەبیت ئەو گەلەك دژوارتر تووش دبن و گۆت: هەكە ماموستایەكی دیت زارۆكەك یێ نەساخە، پێدڤیە فرێكەتە مال دا تێكهەلی زارۆكێن دی نەبیت.
