زانایه‌كێ ناڤدار یێ ئه‌مریكی: ئه‌مریكا و ئورۆپا ئۆكرانیا كرنه قوربانیا به‌رژه‌وه‌ندیێن خوه
ئه‌ڤرۆ:
زانایه‌كێ ناڤدار یێ ئه‌مریكی راگه‌هاند كو ده‌مێ رۆسیا قرم داگیر كری وی ده‌می پێدڤی بوو ئه‌مریكا و وه‌لاتێن ئێكه‌تیا ئورۆپا ل دژی ئه‌مریكا ده‌ست ب بزاڤه‌كا مه‌زن كربا، لێ وان چو نه‌كر و نها ژی ئۆكرانیا بوویه قوربانیا به‌رژه‌وه‌ندیێن ئه‌مریكا و ئورۆپا.
پرۆفیسۆر جۆن میرشایمیر زانایێ ناڤدار یێ ئه‌مریكی راگه‌هاند كو شه‌رێ نها ل ئۆكرانیایێ نیشا دده‌ت كو پۆتینی دڤێت پێگه‌هێ رۆسیا بهێزتر لێ بكه‌ت و بێگومان ده‌مێ پۆتینی ده‌ست ب ئێرشه‌كا وه‌سا كری هزرا گه‌له‌ك تشتان كربوو، دیاره پۆتین یێ پشتراست بوو كو ئه‌مریكا و وه‌لاتێن ناتۆ ل دژی وی چو ناكه‌ن، ئانكۆ ب كریاری شه‌رێ وی ناكه‌ن و ژ به‌ر هندێ ژی ب هه‌موو شیانێن خوه ئێرشی ئۆكرانیایێ دكه‌ت و دیاره رۆسیا دڤێت ئۆكرانیایێ ب ته‌مامی كۆنترۆل بكه‌ت و ژ به‌ر هندێ ژی شه‌رێ نها بوویه ئه‌گه‌ر گه‌له‌ك باژێرێن ئۆكرانیایێ ب ته‌مامی وێران ببن و گۆت: (به‌رپرسێن ئه‌مریكا و ناتۆ هه‌ر رۆژ دبێژین پۆتین تاوانباره و دڤێت شه‌رێ نها بهێته راگرتن، لێ ئه‌و به‌حسێ به‌رپرسیاریا خوه ناكه‌ن، دڤێت ژبیر نه‌كه‌ین ده‌مێ رۆسیایێ قرم داگیر كری وی ده‌می بۆ هه‌ر كه‌سه‌كێ ئاشكرا بوو كو پۆتین كار ل سه‌ر پیلانه‌كا مه‌زن دكه‌ت و پیلانا پۆتینی تنێ گرێدای ئۆكرانیایێ نینه، پۆتین هه‌ست كریه پشتی جودابوونا بریتانیا ژ ئێكه‌تیا ئورۆپا هه‌م ئێكه‌تیا ئورۆپا لاوازه و هه‌م ژی ئه‌مریكا نه‌ڤێت ژ به‌ر به‌رژه‌وه‌ندیێن خوه شه‌رێ رۆسیا بكه‌ت ژ به‌ر هندێ ژی نها ده‌ست ب پیلانا خوه كریه و دڤێت ئۆكرانیایێ داگیر بكه‌ت ئانكۆ ئه‌مریكا ژی به‌رپرسیاره ژ ره‌وشا نها یا ل ئۆكرانیایێ).
زانایێ ناڤدار یێ ئه‌مریكی د به‌رده‌وامیا ئاخڤتنا خوه دا ئه‌و یه‌ك ژی دیار كر كو پۆتینی هه‌ست ب پیلانا ئه‌مریكا و ئێكه‌تیا ئورۆپا ل دژی خوه كر، چونكو وی هه‌ست ب هندێ كر ئه‌مریكا دڤێت ئۆكرانیا ببیته ئه‌نداما ناتۆ و ل ئالیێ دی وه‌لاتێن ئێكه‌تیا ئورۆپا ژی كار بۆ هندێ دكرن كو ئۆكرانیا ببیته ئه‌نداما ئێكه‌تیا ئورۆپا، بێگومان ئه‌و یه‌ك دا بیته ئه‌گه‌رێ هندێ كو رۆسیا ب ته‌مامی هێته دۆرپێچكرن، ژ به‌ر هندێ ژی پۆتینی بریارا ئێرشكرنا سه‌ر ئۆكرانیایێ دا، لێ یێن كو گه‌له‌ك سۆز دانه سه‌رۆكێ ئۆكرانیایێ ئانكۆ به‌رپرسێن ئه‌مریكا و ئێكه‌تیا ئورۆپا نها ئۆكرانیا ب تنێ هێلاینه، راسته چه‌كی دده‌نه ئۆكرانیایێ لێ وه‌كو هه‌ڤپه‌یمانه‌كێ پشته‌ڤانی لێ ناكه‌ن و ئۆكرانیا د راستی دا نها ب تنێ مایه و رۆسیا ژی ب هه‌موو شیانێن خوه ئێرش دكه‌ت، ژ به‌ر هندێ ژی ئه‌ز دبێژم كو ئۆكرانیا بوویه قوربانیا به‌رژه‌وه‌ندیێن ئه‌مریكا و وه‌لاتێن ئێكه‌تیا ئورۆپا و ناتۆ و گۆت: (رۆسیا نه‌شێت ب ساناهی ئۆكرانیایێ داگیر بكه‌ت، چونكو ره‌وشا نها نیشا دده‌ت كو خه‌لكێ ئۆكرانیایێ ب هه‌موو شیانێن خوه ل دژی رۆسیا شه‌ری دكه‌ن، هه‌كه رۆسیا بشێت ئۆكرانیایێ داگیر ژی بكه‌ت ئه‌و یه‌ك دێ رێ بۆ شه‌ره‌كێ ده‌مدرێژ خوه‌ش كه‌ت كو بێگومان ئه‌و یه‌ك د به‌رژه‌وه‌ندیا رۆسیا دا نینه، بارێ ئابووری یێ رۆسیا گونجای نینه كو رۆسیا بشێت ب مه‌هان شه‌رێ ئۆكرانیایێ بكه‌ت، ره‌نگه رۆسیا بڤێت ئۆكرانیایێ پارچه بكه‌ت و پۆتینی به‌ری نها ژی بریاره‌ك ل دۆر هندێ دابوو كو هه‌ر دو هه‌رێمێن لۆهانسك و دۆنتیسك وه‌كو دو ده‌وله‌تێن سه‌ربخوه راگه‌هاندن، لێ دڤێت ژبیر نه‌كه‌ین كو ئه‌مریكا و ناتۆ رێ بۆ رۆسیا خوه‌ش كرن و ئۆكرانیا ژی ب تنێ هێلان و ئه‌و یه‌ك ژی بۆ ئه‌گه‌رێ هندێ كو رۆسیا ب هه‌موو هێزا خوه ئێرشی ئۆكرانیایێ بكه‌ت).
