زانا سالح: بلندكرنا ئالایێ كوردستانێ د قارەمانیێن نێڤدەولەتی دا ئارمانجا منە
ئەڤرۆ
د دیدارەكێ دا یاریزانێ پارێزگەهێ و یانەیا دهۆك بۆ یاریا كیك بۆكسێنگێ زانا سالح كەكۆ كەیفخوەشیا خوە دیار كر ناسناڤێ قارەمانیا ئیراقێ ل سەر ئاستێ كێشا 67 كگم و جهێ خوە د ناڤ رێزێن هەلبژارتیێ ئیراقێ دا پاراستیە و خەون و ئارمانجێن خوە بلندكرنا ئالایێ كوردستانێ د چالاكیێن نێڤدەولەتی دا دیاركریە.
زێدەتر ناڤهاتی گۆت: وەكو ئێك ژ یاریزانێن پارێزگەهێ هەر دژیێ بچووك دا حەز و ڤیانا من بوویە ببمە ئێك ژ یاریزانێن باش و ئالایێ كوردستانێ بلند بكەن، لەوما بوو ڤێ ئارمانجێ بەردەوام راهێنانا دكەم و خوە زەحمەت دەم ب هەڤكاری دگەل راهێنەر و بابێ خوە سالح كەكۆ كو ئێك ژ پالدەر و پشتەڤانێن من یێن سەرەكی یە، د نوكە دا وەكو یاریزانێ هەلبژارتیێ ئیراقێ جهێ خوە پاراستیە و ئەڤە ژی دێ بیتە رێكخوەشكەر پێخەمەت دەستڤە ئینانا ئارمانجێن خوە و گرنگترین ئارمانج ژی بلندكرنا ئالایێ كوردستانێ د قارەمانیێن نێڤدەولەتی دا، لێ هەبوونا پشتەڤانیا دارایی ژی گەلەك یا گرنگە پێخەمەت چارەسەركرنا هەر كێماتیەكێ د دەمێ راهێنانێ و پشكداریێن دەرڤە دا.
هەروەسان زانایێ 20 سالی ئەوێ قارەمانیا عەرەبی ب دەستخوە ڤە ئینایی گۆت: یاریا كیك بۆكسینگێ ئێك ژ بهێزترین یاریانە و یا مەترسیدارە ل سەر چەستەیێ یاریزانێ لێ ئەنجامدانا راهێنانان و رژدی لسەر باشتكرنا ئاستێ خوە دێ ئەڤێ مەترسێ كێمتر لێكەت و گۆت: ئەڤ یاریە ل پارێزگەهێ بەر ب باشتر دچیت لەوما هیڤییا مە ئەوە ژ لایەنێن پەیوەندیدار و یانەیان پشتەڤانیا یاریزانێن خوە بكەن ژبەركو چو كێمتر نینە ژ یاریێن دی بەلكو دشێت ناسناڤێن ئیراقێ و دەرڤە بینن هەروەكو هەر تیمەكا دی.
