زانكۆیا زاخۆ دێ هه‌ژماره‌كا په‌نه‌لان ل دۆر ئاریشه‌یێن هه‌رێمێ ئه‌نجام ده‌ت
زاخۆ، عه‌لی حاجی:
زانكۆیا زاخۆ بۆ ده‌مێ پێنج رۆژان هه‌ژماره‌كا په‌نه‌لێن زانستی یێن جودا ل دۆر ره‌وشا هه‌رێما كوردستانێ ژ چه‌ندین روویان ڤه دێ ئه‌نجام ده‌ت و رێكێن چاره‌سه‌ریێ بۆ هنده‌ك كێشه‌یێن نوكه دێ هێنه دیاركرن و راده‌ستی جهێن شوله‌ژێ دێ هێنه كرن.
دكتۆر مێهڤان شه‌ریڤ، سه‌رۆكێ پشكا زانستێن كارگێری بۆ رۆژناما ئه‌ڤرۆ گۆت: “پێنج ته‌وه‌رێن گرنگ ب رێیا ڤان په‌نه‌لان دێ هێنه به‌حسكرن و پشكداریه‌كا ب هێز ل سه‌ر ئاستێ مێهڤانێن پشكدار د په‌نه‌لان دا هه‌یه، رۆژا ئێكێ دێ یا تایبه‌ت بیت ب ژینگه‌هێ ڤه و رۆژا دویێ ژی دێ ل دۆر ئیسلاما سیاسی بیت و رۆژێن د دووڤ دا ژی دێ گرێدایی سایكلۆژیێ و نیشتمانی و ئازادیا راده‌ربڕینێ بن ل كوردستانێ، د په‌نه‌لان دا ب رێكێن زانستی ئه‌و پێنج ته‌وه‌ر دێ هێنه ئازراندن، دا كو ئه‌م ل چاره‌سه‌ریان بگه‌ڕین بۆ وان كێشه‌یێن نوكه ل هه‌رێما كوردستانێ هه‌ین”.
ناڤهاتی ئه‌و چه‌نده ژی گۆت: “مه ب رێیا ڤان په‌نه‌لان دێ هنده‌ك پێشنیار ل دۆر چاره‌سه‌ریا كێشه‌یان هه‌بن و دێ راده‌ستی جهێن شوله‌ژێ كه‌ین، ژ به‌ركو ئه‌و ئارمانجا مه یا سه‌ره‌كی یه و گرنگه ژی جهێن ئه‌كادیمی رۆل د چاره‌سه‌ركرنا كێشه‌یێن د ناڤ جڤاكی دا هه‌ین؛ هه‌بیت، ژ به‌ر كو ئه‌و كێشه‌یه زێده‌تر دێ ب رێكێن زانستی هێنه چاره‌سه‌ر كرن”.
