زانکۆیا نەورۆز دێ ئاھەنگا گەڕا 12 یا دەرچوونا قوتابیان گێڕیت
ئەڤرۆ نيوز:
بەرپرسێ پشکا راگەھاندنێ ل زانکۆیا نەورۆز بۆ رۆژناما ئەڤرۆ دیار کر کو ل ژێر درووشمێ (شەنگستێ موکومکرنا دیموکراسیەتێ زانکۆیە) زانکۆیا نەورۆز دێ ئاھەنگا گەڕا 12 یا دەرچوونا قوتابیان بۆ سالا خواندنێ (2017 – 2018) ل رۆژا 23-9-2018ێ ل دەمژمێر 5:00 ئێڤاری ل گۆرەپانا یانا دھۆک یا وەرزشی گێڕیت.
فەرسەت مەحمود رەزیکی، بەرپرسێ پشکا راگەھاندنێ ل زانکۆیا نەورۆز ئاشکرا کر کو زێدەتری ھزار و 300 قوتابیان ژ پێنج کۆلیژ و 11 پشکێن زانستی یێن زانکۆیا نەورۆز دێ پشکداریێ د ئاھەنگا گەڕا 12 یا دەرچوونا قوتابیان دا کەن و گۆت: “کەسوکارێن قوتابیان ژی دشێن د ڤێ ئاھەنگێ دا ئامادەبن”.
ناڤھاتی ئاماژە دا وێ چەندێ کو بەری دو رۆژان دەست ب بەلاڤکرنا رۆبێن دەرچوونێ ل زانکۆیا نەورۆز ھاتیەکرن ھەمبەر 50 ھزار دیناران و ھەر دەمێ قوتابی رۆبە بۆ زانکۆیێ زڤراند دێ پارە لێ ھێتە زڤراندن و گۆت:”حەفت پشکێن نوو بۆ سالا نوو یا خواندنێ 2018 – 2019 دێ ل زانکۆیا نەورۆز ھێنە ڤەکرن و وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ ژی رازەمەندیا خوە ل سەر ڤەکرنا ڤان پشکان دیارکریە، بتنێ دو پشک ماینە ھێشتا تێکرایا نمران بۆ نەھاتیە دیارکرن ژ بەر ڤێ چەندێ ھەتا نوکە زانکۆیێ فۆرمێن وەرگرتنا قوتابیان بەلاڤ نەکرینە”.
