زانکۆیێن ئەھلی ب قانوون دێ ھێنە رێکخستن
ھەولێر، قائید میرۆ:
کار بۆ رێکخستنا زانکۆیێن ئەھلی دھێتەکرن و ئەندامەکا لژنا پەروەردە و خواندنا بلند ژی ئاشکرا کر، ھندەک زانکۆیێن ئەھلی پێگیریێ ب بڕیارێن حوکمەتێ ناکەن و ئاریشا قوتابیێن زانکۆیا نەورۆز ژی ل دھۆکێ ھاتیە چارەسەرکرن.
گولستان باقی، ئەنداما لژنا پەروەردە و خواندنا بلند ل پەرلەمانێ کوردستانێ بۆ رۆژنا مائەڤرۆ گۆت: “پەرلەمانێ کوردستانێ مژوولی راستڤەکرنا قانوونا زانکۆیێن ئەھلیە ل ھەرێما کوردستانێ و بڕیارە پشتی راستڤەکرنێ زانکۆیێن ئەھلی بشێوەکێ باشتر بھێتە رێکخستن و کار بۆ وەرگرتنا قوتابیان بکەن، چونکو سالێن بۆری ھژمارەکا بەرچاڤ یا زانکۆیێن ئەھلی ل ھەرێما کوردستانێ ھاتینە دامەزراندن و ھندەک بێسەروبەری د کارێن وان دا دیارە و ئەم دخوازین ھەموو بھێنە راستڤەکرن بشێوەکی د بەرژەوەندیا قوتابیان دا بن بۆ بەرەف پێشبرنا ئاستێ زانستیێ وان زانکۆیێن ئەھلی”.
گولستان باقی گۆتژی: “مخابن ھندەک ژ وان زانکۆیان بڕیار و رێنمایێن حوکمەتێ وەکو خوە بجە نائینن، چونکو سالا بۆری بڕیارا کێمکرنا کرێیا خواندنێ ژلایێ وەزارەتا خواندنا بلند و ڤەکۆلینێن زانستی ھاتە دەرکرن، بەلێ ھندەک زانکۆیێن ئەھلی پێگیری ب کێمکرنا کرێیا خواندنێ نەکر، ھەرچەندە ئەو ئاریشێن ل زانکۆیەکا ئەھلی ل دھۆکێ ھەی ئەم شیاین ھەتا رادەکی چارەسەر بکەین، بەلێ ب گشتی ئەم دخوازین قانوونەکا باشتر بۆ زانکۆیێن ئەھلی ھەبیت و د ھەموو بیاڤان دا بھێنە پێشخستن”.
