زانیار رەجەب: بەرهەڤیێن مە بۆ دەربازبوونێ نە
شاهۆ فەرید:
دهێتە چاڤەڕێ كرن ل 28ێ ڤێ مەهێ دەست ب هەڤڕكیێن وەرزێ نوو یا خولا پلا ئێكا تێنسا ل سەر مێزێ یا ئیراقێ ب پشكدارییا 16 یانەیان ب شێوەیێ كۆمڤەبوون بهێتە كرن، هاتینە بەلاڤكرن ل سەر دو كۆما، هەردو یانەیێن پۆلیتەكنیك و دهۆك وەكو نوونەرێن پارێزگەهێ دێ پشكدارن.
یاریێن وان دێ ل 28ێ هەتا 30ێ ڤێ مەهێ بەردەوامبن و كۆما ئێكێ پێكهاتینە ژ، دهۆك، پۆلیتەكنیك، هەولێر، سۆلاڤ، تۆز، ئاشتی، دەربەندیخان، پێشمەرگە، كۆما دویێ: نەجەف، زیقار، ئەلعەدالە، ئەلئیتحاد، دورە كەربەلا، ئەلكازمیە، ئەلدیجلە و ئەلوەحدە.
ل دۆر دووماهی بەرهەڤیێن یانەیا پۆلیتەكنیك بۆ خولێ د داخویانیەكێ دا ڕاهێنەرێ تیمێ زانیار رەجەب بۆ رۆژنامەیا ئەڤرۆ گۆت: بۆ ماوەیێ مەهەك و 20 رۆژە بەرهەڤی و راهێنانێن تیما مە دەستپێكرینە و ل دووڤ پلانا و بەرنامە هەتا نوكە ب باشی مە خوە بەرهەڤكریە بۆ خولێ، ئەڤ قۆناغە دێ گەلەكا ب زەحمەت بیت، لێ من باوەری ب شیانێن یاریزانێن خوە هەیە، دێ بزاڤێ كەین ببینە هژمارەكا بزەحمەت بۆ یانەیێن بەرامبەر، دێ هەڤركیا دەستڤەئینانا ناسناڤێ خولێ كەین و بەرهەڤیێن مە بۆ دەربازبوونێ نە، هەر یانەیەكێ مافێ پێنچ یاریزانا هەیە، ئەم پێدڤێ ب هاریكاریا دارایی نە ژبۆ ئینانا یاریزانەكێ پێشەكار وەكۆ یانەیێن دیتر.
هەروەسان ناڤهاتی گۆت ژی: كارگێریا یانەیا پۆلیتەكنیكی هاریكار و پالپشتە دگەل مە، لێ پتر ئەم پێدڤی پالپشتیا دارایی نە، چونكۆ ئەڤ قوناغە دێ یا زەحمەتە بیت، بۆ پتر باشكرنا ئاستێ خوە مە پێشەكارەك دڤێت دا رێزێن تیمێ باشتر لێبكەین، ئەگەر ناسناڤی ژیی دەستڤە نە ئینین دێ رێزبەندیێن دەستپێكێ بین.
