زاڕۆك و هزر
سیلاڤ بازێركی
پترییا سەمیانێن زاڕۆكان بۆ ڕازیكرنا زاڕۆكی ب ڕێیەكا ئێكسەر و ب ساناهی پەنایێ دبەنە بەر دڕەو كرنێ، بۆ نموونە ل جهێ بێژیتە زاڕۆكی دێ تە بەمە نەخۆشخانێ دێ بێژیتێ دێ تە بەمە جهێ یارییان، دبیت ئەڤە گەلەك یا نۆرمال بیت ل دەڤ مە و ب چاڤەكێ سڤك تەماشە بكەینی، لێ د ڕاستی دا درەو هەر درەوە تۆ دگەل مەزنان یان زاڕۆكان درەوێ بكەی هەر دێ بیتە ئەگەرێ شكاندنا ئەوێ ستوینا باوەریێ، ب دیتنا من درەوكرن دگەل زاڕۆكێ خوە كاریگەرییا وێ خرابترە دگەل درەوكرنێ دگەل مەزنان تۆ دێ چەند دایكەكا شكەستی ئەگەر ئەو زاڕۆكێ ژ خوینا تە باوەری بتە نەبیت! ئەرێ تۆ كەسایەتییا وی زاڕۆكی چاوا ئاڤادكەی ئەگەر هەر ژ دەستپێكا ژیانا وی تە ئەو فێری درەوان كر؟
ل جهێ ڕازیكرنا زاڕۆكی ب ڕێكەكا ێكسەر ب درەوكرنێ هوون وەك دایك و بابێن ڕەوشەنبیر هەر تشتەكی ب جوانی بۆ زاڕۆكێ خوە شلۆڤە بكەن دبیت پرسیاریێن زاڕۆكی تە ماندی بكەن، لێ تۆ یێ كەسایەتیا زاڕۆكی ئاڤا دكەی و وی فێری شێوازێ ئاخفتن و دەربرینێ دكەی و ب ڕاستیژی پرسیارێن زاڕۆكان ژێدەرێ فەلسەفێ نە!
زانەیەك دبێژیت: هەكە تۆ نە شیای بابەتەكی ب تەمامی بۆ زاڕۆكەكێ پێنج سالی شلۆڤەبكەی باش بزانە ل وی دەمی تۆ ب خوە د وی بابەتی نە گەهشتیە!
دبیت گەلەك دایك و باب بێژن ئەم چ جاران درەوێ دگەل زاڕۆكێن خوە ناكەین، لێ هەر زاڕۆكێ مە درەوان دكەت چەندین پسپۆرێن بۆارێ پەروەردەكرنا زاڕۆكان ل دۆر ئەڤێ چەندێ دبێژن زاڕۆك ل ژیێ ٣_٥ سالیێ نەشێت جووداهیێ د ناڤبەرا خەیالا هزرێن خوە و ڕاستیێ دا بكەت، لەوما دێ بینی گەلەك جاران زاڕۆك ئاخفتنێن خەیالی د بێژیت ئەڤ چەندە ب هیچ رەنگەكی تا تەمەنێ پێنج سالیێ نابیتە درەو چونكی د ئەڤی تەمەنی دا جووداهی دناڤبەرا خەیال و ڕاستیێ دا ژ شیانێن زاڕۆكی مەزنترە.
لەوما تۆ وەك سەمیانێ زاڕۆكی بەردەوام دانوستاندنێ دگەل بكە تێكەلی هزر و خەیالێن زاڕۆكی ببە و وی بۆ جیهانا راستی ئامادە بكە، ب ڕاستی ژی خۆشی و هەستەكێ تایبەت یێ د دانوستاندنا دگەل زاڕۆكی دا هەی ژبەر كو هەر تشتەكێ د دل و مێشكێ وان دا پێكۆلێ دكەن ب هەر رێكەكا هەبیت بیننە سەر زمانێ خوە، لەزێ بكە و خۆشیێ ژ پەروەردەكرنا زاڕۆكێ خوە وەربگرە، ژبەركو ب ڕاستی ژی زاڕۆك گەلەك زووتر ژوێ یا ئەم هزر بۆ دكەین مەزن دبن.
ل دووماهیێ ئاهەنگەكا هونەری ب پشكداریا هونەرمەندێ پێشمەرگە (شاكر ئاكرەیی) و هەلبەستڤان (شەعبان سلێمان) و سترانبێژ (هشیار كۆچەر) هاتە گێڕان.
