زكئێشانا ژنا دوگیان كەنگی جهێ مەترسیێ یە؟
د. جەنان نوری حەسەن، تایبەتمەندا نەخۆشیێن ژنان و زارۆكبوونێ، دیاركر گەلەك جاران ژنا دوگیان سەرەدانا نەخوشخانێ دكەت، یان دێ چیتە دەف نۆشدارا خۆ یا تایبەت ژبەر زكئێشانێ، تشتێ گرنك ئەوە كو ژنا دوگیان بزانیت نەهەمی دەما ئەڤ زكئێشانە یا ب مەترسیە، بەلێ بلا بزانیت كو بارا پتر ژڤان ئێشانان یاسروشتیە، چونكو ئەڤە گیانەكە و دناڤ زكێ وێدا مەزن دبیت، ئەكید دێ هەرئێشانەك هەبیت پیچ پیچە مالبچووك دێ مەزن بیت ب تایبەت هەرسێ هەیڤێن ئێكێ و گەلەك جێوازی یاهەی هەكە ژنا نەخری بیت یان بچووكێ ئێكێ بیت، بێگومان ژنا نەخری دێ پتر زكێ وێ ئێشیت.
د. جەنان نوری حەسەن، دیاركر ژی ئێشانەكا هەی گەلەكا بەربەلاڤە بارا پتر ژنكێن مە دێ بێژن دەمێ هندەك لڤینان دكەت یان خۆ ب قولپینیت یانژی وەختێ رادبیت و دروونیت زكێ وێ دئێشیت و گۆت: هەلبەت ل وی دەمی پتر بزاڤ و گڤاشتن دكەڤنە سەر زكێ ژنێ و ئەڤ ئێشانە چنینە و یا سرۆشتی یە و پتر ل دەف وان ژنان پەیدادبیت یێن كالسیومێ وان یێ كێم بیت یاباش ئەوە ژنا ب دوگیان شیری ڤەخۆت، چونكو شیری گەلەك كالسیوم یێ تێداهەی، یانژی ماستی بخۆت یانژی خو هەكە ئاڤەماستێ ڤەخۆت دێ نەڕماتیەك د مالبچووكی دا پەیدابیت و ئێشان كێم بیت.
هەروەسا دیاركر كۆ گەلەك جاران دەمێ ژن دچیتە دەستاڤێ كو جهێ مێزدانكێ ب ئێك جاری خالی كەت ئەوێ ژی ئێشانەكا هەی، بەلێ نەكو دەستئاڤا زراڤ ب سوژیت، چونكو سۆتنا دەستئاڤا زراڤ، ئانكو وێ هەودانێن میزدانكێ هەنە كو ددەمێ دوگیانیێدا گەلەگ بەربەلاڤن، بەلكو ئێشانەكا بهێز ژ دەقیقەكێ كێمتر ئەڤە دیسان چنینە.
كەنگی دێ بێژی مەترسی یا هەی؟
د. جەنان نوری گۆت: ئێشانا زكی مەترسیە دەمێ كو ڤێ ژنێ ئێشانەكا گەلەك بهێز بۆ چێببیت، وەكو ئێشانا دەورێ، بەلێ دگەل دەورا هەیڤانە گەلەكا بهێزبیت دێ گریت و بەردەت، ئەڤە ڕامانا وێ ئەوە ئێشانا وێ یا ب مەترسیە و ژان یا كەتیە مالبچووكێ وێ دڤێت زویكا پرسیارا خۆ بكەت، یانژی دەمێ ئێشان هەبیت و دگەل هندێ خۆینێ دبینیت، یان خوینبەربوون یا بوو چێبووی، ئەڤ خوین دیتنە دگەل زكئێشانێ دیسان خرابیا خۆ یا هەی و ڕامانا وێ ئەوە تشتەك یێ هەی، یانژی مەترسیەك یا هەی ل سەر وێ و زارۆكێ وێ و دڤێت گەلەك زویكا پرسیارا خۆ بكەت.
د. جەنان نوری، دیاركر، هەكو ئێشان دگەل دەستئاڤا زراڤ بیت و جهێ دەستئاڤێ گەلەك ب سوژیت یان گەلەك بچیتە دەستئاڤێ، ئەڤە نیشانا وێ چەندێ یە كو ئەوێ هەودانێن دەستئاڤا زراڤ دا یێن هەین، یانژی گۆلچیسك گەلەك دگەل ب ئێشن دڤێت زوی چارەسەریا خۆ بكەت، چونكی هەودان گەلەك جاران دبنە ئەگەرێ هندێ كو ژن بچویكێ خۆ ژدەست بدەت، یانژی بەری دەمی بهێتە سەر دونیایی، دیسان دەمێ پشتئێشانەكا بهێز دگەل بیت، یانژی دگەل زكئێشانێ رەقبوونەكا نە سرۆشتی د زكیدا هەبیت و ئەو ئێشان بمینیت یان لڤینا بچویكی یا كێم بیت دیسان ئەڤە دڤێت زویكا چارەسەریا خۆ بكەت.
