زمانێ شرین
هەژار ئاڤدەل
ئەز زمانێ شرین و رەسەن و خوەشێ تەڤ کوردانم
خۆشییا پەیڤێن لەکی و زازاکی و لۆری و کرمانجیانم
مێرنشینێن هەکاری و ئەردەلان و بادینان و سۆرانم
پەیڤێن مەولەوی وگۆران و دو کوڕێن بەهائەدینانم
پێنوسێ حاجییێ کۆی ومەولەوی و سێکوچکەی بابانم
چوارینێن بابەتاهیرێ هەمەدانی وهەژارێ موکریانیانم
دێر وبەیتێن نالبەند و وەفایی ومایی وبێکەس ومەحویانم
پەسنا مەلایێ جزیری بو هەردو کەوێن روباد عەلیانم
روژنامەیا ب ناڤ کوردستانا مقداد مەدحەت بەدرخانم
گوڤارا رەنگینا گەلاوێژ و هەوار و ژین وبانگی کوردستانم
پەرتووکا مەم و زینا خانی و شەرەفنامەیا شەرەفخانم
وەشانێن ناری وقانع و رەفیق حلمی و هەردو معرووفانم
دەنگێ کایا و جزراوی و تەحسین تەها و ئەیازێ جانم
نارینك و ئاوازێن گولبهار و مریەم خان و عەیشاشانم
مەوالێن رەسول گەردی و مەحەمد عارف و ئەردەوانم
حەیرانێن کاویس ئاغا و حەسەن زیرەك و علی مەردانم
سترانێن ب هەست وتەمبۆرا مەحەمد شێخو و ئارام تیگرانم
هۆزانێن مەستوورە ئەردەلان وقەدری جان و حەبسە خانم
رۆمانێن عەرەبێ شەمۆ وچیڕۆکێن ئەحمەد موختارێ جافانم
ڤەگێڕا عەشق ومەحبەتا فەرهاد و سیابەند و مەمێ ئالانم
سۆزا ڤیان و وەفادارییا شرین خان و خەجۆك و زینا بۆتانم
پەیڤێن چیڕۆکا پاقژ و دل ئێشا زەمبیلفرۆشا فەقییێ تەیرانم
داستانا دمدم و چیڤانۆکێن روستەمێ زال ومیرێ هەکاریانم
بەندێن دیوان و دیلانێن ب حەیرانۆك و پەستە و مەوال وسترانم
پارێزڤانا شەڤبێریێن درێژێن ب چیڕۆك و مەتەلۆك و مامکانم
سروودا ئەی رەقیبا دلدار و کۆپلەیێن تیرێژ و جەگەرخوینانم
خالا هەڤپشك و کۆدەنگا هەر چوار پارچەیێن کوردستانم
ئەز ناسنامە و دیرۆك و گازییا شرینا ئەزمانێ تەڤ کوردانم
