زنار هشیار بەهرەمەندە و پاشەرۆژەكا گەش ل پێشییا وی یە
د داخویانیەكێ دا جێگرێ سەرۆكێ فدراسیۆنا باسكێت بۆلا ئیراقێ دیار كر ل سەر ئاستێ ئیراقێ ب تنێ دو یاریزانێن بەهرەمەند ل سەر ئاستێ گەنجان مە بۆ ناڤ رێزێن هەلبژارتیێ ئیراقێ یێ پێشكەفتیان داخواز كرینە خوە بەرهەڤكرن بۆ ڤاڤارتنێن كێشوەرێ ئاسیا بۆ كۆپا ئاسیا و دەربازبوون بەر ب مۆندیالا جیهانی.
زێدەتر د. خالد نەجم گۆت: سەرئێخستنا یاریزانێ گەنج بۆ ناڤ رێزێن هەلبژارتیێ ئیراقێ یێ پێشكەفتیان یا بزەحمەتە ژبەر جوداهییا ئاست و شارەزاهیێ، لێ ئەو شیان و بەهرەمەندییا دو یاریزانێن دناڤ خولا لاوان دا هاتینە دیتن سەرنجا مە و ڕاهێنەرێ هەلبژارتیێ پێشكەفتیان كێشایە و هەرزوو داخواز كری هەردو یاریزان بهێنە دناڤ رێزێن تیمێ دا ئەو ژی یێ یانەیا زاخۆ زنار هشیار و یێ یانەیا حلە عەلی عەلا كو ب زەحمەتە یاریزان ب بەهرەمەندییا خوە یا هوسا دەست مە بكەڤن، لەوما ژی هەردو یاریزان تایبەت زنار هشیار بەهەرمەندەكێ خودان شیانە و پاشەرۆژەكا گەش یا ل پێشییا وی هەیی دڤێت بەردەوامبیت دا زێدەتر خوە پێشبێخیت.
ژلایێ خوەڤە زنار هشیاری كەیفخوەشیا خوە دیار كر و گۆت: پێخوەشحالم د ژییەكێ بچووك دا بهێمە د ناڤ رێزێن هەلبژارتیێ ئیراقێ یێ پێشكەفتیان دا، گەشبینم دێ دگەل هەڤالێن خوە ئاست و ئەنجامێن باش ب دەستڤە ئینن و دلێ جەماوەرێ كەیخوەش كەین.
