زنجیرا درامایی (لیلة السقوط) جیهانا عەرەبی هەژاندیە
ئەڤرۆ
ئەڤرۆ، سالار محەمەد دۆسكی:
زنجیرا درامایی (لیلە السقوط) ئانكو (شەڤا كەفتنێ) ب زمانێ عەرەبی و ب پشكداری یا چەندین هونەرمەندێن بناڤ و دەنگ ل (كوردستانێ، عیراق، مسرێ، تونس، سوریا، ئوردن) ب پشتەڤانی یا دارایی ژلایێ حوكمەتا هەرێما كوردستانێ نوكە ل چەندین كەنالێن عەرەبی ل هەیڤا رەمەزانێ دهێتە پەخشكرن.
عادل عەبدوالرحمان، رێڤەبەرێ بەرهەمی و ئەكتەر دناڤا زنجیرێ دا بۆ ئەڤرۆ گۆت: زنجیرێ گەلەك پەیام هەبووینە و تایبەت دیاركرنا درندەی یا داعش دژی مرۆڤایەتیێ و تایبەت مللەتێ كورد و هێرشكرنا سەر مویسل و شنگال و دیسا رۆل و قوربانی دانا پێشمەرگێ كوردستانێ، بەرچافكرنا جینوسایدكرنا شنگال و بگشتی خوراگری یا مللەتێ كورد بەرامبەر ڤێ رێكخراوا تیرۆرستی و كەفتنا داعش ل سەر دەستێ كوردان.
عادلی ئاشكراكر ژی كو بینەرێ ڤێ زنجیرێ ژ هەمی زنجیرێن رەمەزانێ زێدەترە ، ل جیهانا عەرەبی بگشتی وەلاتێ مسرێ بتایبەتی كو نمرا پیڤای شكاندیە ب بینەریێ شكاندیە.
موصدق بەرزنجی، رۆلێ ئەفسەرەكێ هەوالگێریا عیراقێ دناڤا زنجیرێ دا دگێریت بۆ ئەڤرۆ گۆت: زنجیرە ژ دەرهێنان (ناجی توعمە) یە كو خەلكێ سوریایێ یە و رۆلێ من پشتی هاتنا داعش دیاردبیت كو ل سەرکردێن داعش دگەرن.
بەرزنجی گۆتژی: دناڤا زنجیرێ دا دهێتە دیاركرن كو حوكمەتا عیراقێ داخازێ ژ حوكمەتا هەرێما كوردستانێ دكەت هاریكاربیت دئازادكرنا باژێرێ مویسل دا ژ دەستێ داعش چونكە ئەو بتنێ نەشێت ئازاد بكەت و پێشمەرگەی رۆلەكێ مەزن هەیە دئازادكرنا باژێرێ مویسل دا و هێشتا داعش دناڤا مویسل دا پێشمەرگە شیا ب رێكێن هەوالگێری جهێن سەركردێن داعش ل مویسل دیاربكەت و ئەڤە بوونە رێكخوشكەر پێشمەرگە گەلەك ب دلێرانە بەر سینگێ ڤێ تاقما تیرۆرستی بگریت وی باژێری ئازاد بكەت.
تارق ئاكرەیی، رۆلێ (كاوە)ی دزنجیردا دگێریت، كو رولەكێ سەرەكی بوویە بۆ رۆژناما ئەڤرۆ گۆت: زنجیرە بەحسێ قوناغەكا گرنگ دكەت ل هەرێما كوردستانێ و پەیامەكا مەزن تێدا هەیە و رەنگە هێشتا هندەك دیتنا وان بۆ كوردان یا جودا بوویە كو ئەڤە پتر ژ 100 سالانە مللەتێ كورد خەباتێ دكەت كو كورد نەتەوە كە چ جا زەڕەرا خەلكی نەكریە و بتنێ بەرەڤانیكریە و گەلەك قوربانی دایە، بمخابنی ڤە چەندین سالە راگەهاندنا كوردی نەشیایە ڤێ بدەست ڤە بنیت بەلكو زنجیرەكا بڤی رەنگی دەمێ ل چەندین كەنالێن عەرەبی دا دهێتە نیشادان ئەف مێژوویە بۆ پتر ژ 300 ملیون عەرەبان دهێتە نیشادان و دەمێ خەلك هەمی بینەریێ و گوهداریێ ل كەت ئەو پەیاما مە دڤێت ب زووترین دەم دێ گەهیت و ئەڤە كارەكێ گەلەك گرنگە.
تارقی بەحسێ رۆلێ خوە كر و گۆت: خودانێ ئوتێلا (نەینەوا ئوپرایە) مە كو بەری هاتنا داعش خودانێ ئوتێلێ رۆلەكێ مرۆڤاتیێ جوان ل گەل هەژاران و دەست كورتان هەبوویە و پشتی هاتنا داعش ل 2014 رۆلێ ڤی مرۆڤی گەلەك ب جوانی دیاردبیت و كو كوردان رەوشەنبیری یا پێكڤە ژیانێ هەیە ل گەل هەمی برایێن نەتەوە و ئاینێن دی و خوشی و نەخوشیان پێكڤە ژیاینە.
تارق ئاكرەیی ئەو ژی گۆت: وێنەكرنا ڤێ زنجیرێ هەشت هەیڤ بوون پتر دیمەن ل هەولێرێ و دەرو روبەرێن هەولێرێ ئانكو ل قەزا خەبات بووینە و هندەك دیمەن ل نێزیك مویسل ژی هاتینەگرتن ژ روویێ لوجسكی ڤە ب زەحمەت بوو زێدەتر دناڤا مویسل دا هاتبیتە وێنەكرن چونكە ئینان و برنا وی چەكێ مەزن ماندیبوونەك بۆ دڤیا.
ئاكرەیی ئەو ژی ئاشكراكر كو دراما ناڤبری ژ 30 خەلەك هاتینە دورستكرن و هەر خەلەكەک نێزیكی 35 خولەكانە و پشتەڤانیا دارایی ژلایێ حوكمەتا هەرێما كوردستانێ ڤە بوویە.
تارق ئاكرەیی گۆتژی: جارا ئێكێ یە زنجیرەكا بڤی سەنگ و هێزێ ل سەر ئاستێ زنجیرێن درامایی یێن عەرەبی ل كوردستانێ بهێتە دروستكرن و هەژمارەكا مەزن یا هونەرمەندێن بناڤ و دەنگێن عەرەب پشكداربووینە و پەیامەكە بۆ پتر ژ 300 ملیون عەرەبان و ئەڤە تشتەكێ كێم نینە بەلكو گەلەكێ مەزنە.
هێشتا گۆت: گەلەك كەنالێن عەرەبی ڤیا ڤێ زنجیرێ پەخش بكەن لێ رەنگە كاودانێن سیاسی نەشیابن پەخش بكەن چونكە بەحسێ داعش و شیعان و گەلەك بابەت هاتینە ئازراندن.
تارق گۆت: ب باوەرم دیتنا جیهانا عەرەبی بەرامبەر كوردان پشتی ڤێ درامایێ لڤینەك بكەڤیتێ و چونكە پێشتر مسرێ بتنێ زانیاری هەبوون كو سەركردە (صەلاح الدین ئەیوبی) كوردە و قودس رزگار كریە و دەولەتا ئەیوبی هاتیە دروستكرن.
هێشتا گۆت: تەلەڤزیون دچیتە دناڤا هەمی مالان دا راستەوخو و هەر تشتەكێ بهێتە پەخشكرن زویتر دگەهیت و ئەڤە تشتەكێ گرنگە، بۆ نموونە چەندین سالە وەك راگەهاندنا كوردی كار كریە ب گەهاندنا پەیامەكێ بۆ جیهانا عەرەبی ب دروستكرنا كەنالێن عەرەبی و نەشیاینە ب دورستی پەیامێ بگەهینن بەلكو ئەڤ زنجیرەك رۆلەكێ هەرە مەزن و گرنگ هەیە بۆ گەهاندنێ.
تارق ئاكرەیی گۆتژی: ژ هەموو زنجیرێن هەیڤا رەمەزانێ زێدەتر ڤێ زنجیرێ بینەر ل جیهانا عەرەبی دروست كریە و تایبەت ل وەلاتێ مسرێ نمرا پیڤای شكاندیە و راگەهاندنا عەرەبی گەلەك بەحسێ ڤێ زنجیرێ كریە و ئێك ژ رەخنەگرێن عیراقیێ بناڤێ (مەهدی عەباس) هێشتا ل خەلەكا سیێ بوو بەحسێ ڤێ زنجیرێ كریە و دبێژیت ئەڤە ئێك ژ 10 زنجیرێن گرنگ ل هەیڤا رەمەزانێ دهێتە پەخشكرن و ئەڤە باشترین بەلگەیە ل سەر سەنگ و هێزا ڤێ زنجیرا گرنگ، ب شێوەكێ گشتی كارەكێ مەزنە و دێ كاریگەری هەبیت ل هەرێما كوردستانێ و دەرڤە.
ل دووماهیێ ئاكرەیی گۆت: گرنگە سەركردایەتیا كوردستانێ گرنگیێ ب درامایێ بدەت و كاری ل سەر بكەت و مخابنی ڤە وەزارەتا رەوشەنبیری هەر چ نەمایە وەك فەرمانگەهەكا ئاڤ و كارەبێ لێ هاتیە و رەنگە ئەو هەر دو فەرمانگەه ژ وەزارەتا رەوشەنبیری باشتر بن ژی.
