“زه‌لال” دێ بیته ده‌رگه‌هه‌ك بۆ ئازادیا ژنا كورد
ئه‌ڤرۆ نیۆز،زنار تۆڤى:
ده‌ڤریم كارادا ئه‌كته‌ره‌كا باكۆرێ كوردستانێ یه و نوكه ل باژێرێ سته‌مبۆلێ دژیت،د دیداره‌كێدا بۆ ئه‌ڤرۆ نیۆز دبێژیت:ئه‌ڤه نێزیكى 22 سالانه ئه‌ز ل باژێرێ سته‌مبۆلێ دژیم،هه‌ر چه‌نده به‌رى نوكه من د چو فلمان كارێ ئه‌كته‌ریێ نه‌گێرایه،لێ ده‌مێ من ل قوتابخانێ د خواند من هوازن د گۆتن و من گه‌له‌ك حه‌ز ل سه‌ر كارێ ئه‌كته‌ریێ هه‌بوو،لێ ل سالا بورى ئه‌ڤ خه‌ونا من یا چه‌ندین سالان بجه هات،بۆ ئێكه‌مین جار ژى من پشكدارى دفلمه‌كێ كوردى كر و من رۆلێ سه‌ره‌كى ژى د وى كورته فلمێ كوردى دا گێرایه.
هەروەسا گۆت ژى:ده‌رهێنه‌ره‌كا كورد ل سته‌مبۆلێ داخواز ژ من كر كو ئه‌ز پشكداریێ د فلمه‌كێ كوردى دا بكه‌م و بێى دو دلى و ئێكسه‌ر ئه‌ز ل سه‌ر داخوازا وێ رازى بووم،ژبه‌ركو هه‌رده‌م من ڤیایه خزمه‌تا هونه‌رێ كوردى بكه‌م،هه‌روه‌سا ئه‌و كورته فلمێ من رۆلێ سه‌ره‌كى تێدا گێراى ناڤێ وى ” زه‌لاله” و ناڤه‌رۆكا وى ژى ل سه‌ر ژنا كورده،كو به‌حسێ ژیانا ژنه‌كا كورد دكه‌ت،ده‌مێ ژ گوندان قه‌ستا باژێرى دكه‌ت،لێ زه‌لامێ وێ ژنا كورد مریه و بتنێ كوره‌ك هه‌یه،لێ ژبه‌ركو هه‌رده‌م ژنا كورد ئاسته‌نگ و ده‌رده‌سه‌رى دیتینه،دیسا “زه‌لال” ژى ده‌مێ ژ گوندى دچیته باژێرى گه‌له‌ك نه‌خۆشیێن ژیانێ دبینیت و نه‌شێن ب چیته ژ ده‌رڤه و بۆ خوه كاره‌كێ بكه‌ت،ژ پێخه‌مه‌ت بشێت زارۆیێ خوه ب خودان بكه‌ت،لێ پشتى ده‌مه‌كێ درێژ هه‌ڤاله‌كا وێ بۆ كاره‌كێ دبینیت و ژ وێ رۆژێ ژیانا وێ دهێته گوهۆرین و ئه‌ڤ كورته فلمه به‌حسێ وان روودانان دكه‌ت.
ناڤهاتیێ گۆت ژى:من گه‌له‌ك حه‌ز دكر دڤى كورته فلمى دا كار بكه‌م،ژبه‌ركو ئه‌ز ژى ژنم و هه‌روه‌سا ژنێن باكۆرێ كوردستانێ هه‌موویان ده‌ردێ “زه‌لالێ” هه‌یه و هه‌موو دبن ده‌ستن و ژیانا خوه دناڤا ئێش و ئازاران دا دبورینن،هه‌روه‌سا هه‌كه ژنا كورد ل باكۆرێ كوردستانێ ببیته نوشدار و ماموستا و پارێره‌ز و هه‌ر كار و باوه‌رنامه‌یه‌ك هه‌بیت،دبن ده‌ستیێ دایه،له‌ورا دڤێت ئێدى ژنا كورد ژى ئازاد بیت و بگه‌هیته مافێن خوه،لێ مخابن هه‌تا نوكه ژى ئاسته‌نگى دكه‌ڤنه د رێیا ژنا كورد دا ل باكۆر،له‌ورا كورته فلمێ”زه‌لال” دێ بیته ده‌رگه‌هه‌ك بۆ ژنا كورد و دێ هیڤیه‌كێ بۆ وان دروست كه‌ت و گۆت ژى:شه‌ش كه‌سان پشكدارى دڤى كورته فلمى دا كریه و ل سته‌مبۆلێ و ده‌ردورێن وێ هاتیه وێنه‌كرن و فلم 17 خۆله‌كان یێ درێژه.
ده‌ڤریمێ دیاركر ژى:ڤى كورته فلمى پشكدارى د چه‌ندین فیسته‌ڤالان دا ل توركیا كریه و خه‌لاتێ ئێكێ ل فیسته‌ڤالا”ئیكا سه‌ڤه” ل سه‌رانسه‌رى توركیا ب ده‌ست خوه‌ڤه ئینایه و ئه‌ڤ كورته فلمه ب زمانێ كوردى هاتیه چێكرن،دیسا مه ل به‌ره پشكداریێ د چه‌ندین فلمه فیسته‌ڤالێن كوردى و جیهانى دا ژى بكه‌ین،هه‌روه‌سا من ل به‌ره وه‌ك ئه‌كته‌ره‌كا كورد پشكداریێ د چه‌ندین فلمێن دى یێن كوردى دا بكه‌م،لێ من هزر نه‌كریه چو جاران پشكداریێ د فلمێن توركى دا بكه‌م.