زه‌لامان به‌رامبه‌ر ره‌تكرنا فره ژنیێ چ ژ ژنان دڤێت
ئه‌ڤرۆ نیوز ، نه‌وزاد هلۆرى:
فره‌ژنى ل هه‌موو جیهانێ هه‌یه ، به‌لێ هه‌ر وه‌لاته‌كێ ل گوره‌ى هنده‌ك قانون و رێنمایان رێكخستن بو كریه ، و ل هه‌رێما كوردستانێ ژى فره‌ژنى ب هنده‌ك مه‌رجان ڤه گرێدایه ، به‌روڤاژى ب چوو شێوه‌یان ناهێته قبولكرن ، شاره‌زایه‌كێ جڤاكى دده‌تن دیاركرن كو ئه‌و ژنا فه‌رژنیێ قبول نه‌كه‌ت پێدڤى یه قه‌ره‌بویا فره‌ژنیێ بو زه‌لامێ خوه بكه‌ت ب هه‌ر رێیه‌كا هه‌بیت.
یاسین محه‌مه‌د شاره‌زایێ جڤاكى ل ده‌ڤه‌را بارزان دیاركر كو فره‌ژنى دیارده‌یه‌ك ئاینى و جیهانى یه و چو قانون نكارن ب ئێكجارى ژناڤ ببه‌ن و ب ئه‌ڤرۆ نیوز گۆت: ( ل هه‌موو ئاینێن ئاسمانى و ل هه‌موو قانونێن هه‌رێمى و جیهانى فه‌ره‌ژنى هه‌یه و دێ هه‌ر هه‌بیت ژى ، به‌لێ ب مه‌رجێ كو كارتێكرنێ ل په‌یوه‌ندیا ئێكێ یا هه‌ڤژینیێ نه‌كه‌ت ، و فره‌ژنیێ ژى ئه‌رێنى و نه‌رێنیێن خوه هه‌نه ، بو هنده‌ك كه‌سان درۆست و ئه‌رێنى یه و بو هنده‌ك كه‌سان ژى نه درۆسته و نابیت بهێته‌كرن).
زێده‌تر گۆت: ( ره‌تكرنا فره‌ژنیێ ژلایێ ژنان ڤه بێى ئه‌گه‌ر و خواندن و تێگه‌هشتن و دوڤچوون كاره‌كێ نه درۆسته ، بو نموونه ئه‌گه‌ر زه‌لامه‌ك دلێ خوه ببه‌ت ژنه‌كێ و ئه‌گه‌را وى ئه‌و بیت كو هه‌ڤژینا وى ژلایێ ساخله‌میى و ئه‌قلى و هه‌تا خوه ژلایێ سێكسى ڤه نه‌یا گونجایه و ب كێر ژین و ژیانا وى ناهێت و هه‌بوونا وێ دێ بیته سه‌ده‌م كو كارتێكرنێ ل خێزان و مال و مالداریا وى بكه‌ت و ئاخفتنێن وى ژلایێ قانون و راپورتا نوژدارى بهێته سه‌لماندن كو ئه‌و یێ راستگو و درۆسته ، بو ئه‌ڤان جوره مرۆڤان درۆسته كو ژنه‌كا دن بینیت ، و هه‌ر ژنه‌كا نه‌كاریت ڤێ یه‌كێ بو هه‌ڤینێ خوه قه‌ره‌بو بكه‌ت نابیت هه‌ڤدژى فره‌ژنیێ راوه‌ستیت ، به‌لێ دڤێت بزانین ژى كو نابیت هه‌رده‌ما زه‌لامه‌كێ ڤیا ژنه‌كێ بینیت و ژنا وى هه‌موو مه‌رجێن ساخله‌میێ و عه‌قلى تێدا هه‌بن و ئه‌و ژنه‌ك دن بینیت).
ناڤبرى دیاركر ژى كو گه‌له‌ك پێدڤى یه هه‌ردوو هه‌ڤژین قه‌ره‌بویا هه‌ڤدوو بكه‌ن و هوشیارى هه‌ڤدوو بن ب تایبه‌تى ژلایێ دلێنى ڤه و گۆت ژى: (هه‌ڤژینى پرۆژه‌یه‌كێ ستراتیجیێ دومدرێژه و هه‌موو ژیانا مرۆڤى كونترول دكه‌ت، ژ به‌رڤێ یا گرنگه كو بنه‌ره‌هـ و ئه‌ساسێ پرۆژه‌یه‌كێ هه‌ڤژینیێ به‌رى وه‌خت باش بهێته دانان داكو دوڤدا پرۆژه خراپ نه‌بیت ، ژبه‌ركو ئه‌گه‌ر بنه‌مایێ پرۆژه‌ى باش نه‌بوو دێ ژبه‌رێك چیت و هه‌ڤژینیى وێران بیت ، یا ژ هه‌مووان نه‌خوشتر ژى ئه‌وه كو ئه‌و زاروكێن كو دناڤبه‌را هه‌ڤژینان دا هاتینه هه‌بوونێ دكه‌ڤنه بن كارتێكرنێن ده‌رونیێن زور و دڤێت ژ بیر نه‌كه‌ین ژى كو پرانیا ژنان پشتى فره‌ژنیێ نكارن ل گه‌ل هه‌ڤ بژین و گه‌له‌ك ژى یا ب زه‌حمه‌ته زه‌لامه‌ك بكاریت دڤى ده‌مى دا ئێكسانیێ دناڤبه‌را هه‌ڤژینان رابگریت ژبه‌ركو ده‌زگه‌هێن راگه‌هاندن و ته‌كنولوژیا و جڤاك و رێكخراوێن جڤاكى هه‌ڤكار نینن كو فره‌ژنیى روولێ خوه ببینیت)
