زه‌نۆبیا و بازرگانه‌كێ ته‌دمور
عارف حیتو
وی بازرگانی ل حه‌زره‌تا زه‌نۆبیایێ
به‌حسی متایێ خوه دكر و بهایێ تشتان دزانی
ده‌رێ رێكێن دوور ڤه‌دكر و
ب كانیكا میرگه‌هێ د ڕانی
ما د سه‌رده‌مێن قه‌یرانكی دا…
چ تشتێ ب قیمه‌تتر هه‌یه ژ سه‌وكا نانی؟!
كو لێهمشتێ ژ زه‌ڤیا دووركه‌ت
وڕه‌ی نه‌ئێخته بن پیا و مێشان ژ هنگڤینی ڤه‌ده‌ت
ته‌ڤ كوباری و چریسه‌تیا ب ئه‌نیێڤه بوویه پێرۆ
ل به‌ر بازاڕی مه‌جبووره…
ئه‌گه‌ر نه‌ده‌ی، دێ ئوردیا دی پتر ده‌ت!
مه هه‌ردووان پێكڤه ب ده‌نگه‌ك بلند دگۆتی:
سه‌پتیما زه‌نۆبیا…
سه‌پتیما زه‌نۆبیا….
ل وێ ئێڤارا به‌ری مرن بگه‌هیت توخیبێ دیتنێ
چاڤێن وی ل سه‌ر مه‌مكێن وێ بوو
چاڤێ من ل سه‌ر تیر و شمشیرێن سینگێ وێ
دلێ وی ل سه‌ر خلخالا دبه‌ر پیێ وێ بوو
دلێ من ل سه‌ر گه‌رمی و ساریا پێنگاڤا وێ
خه‌ونا وی ستێره‌كا ساویلكه یا نه‌به‌له‌د بوو
ب پێكهاتن داڕژیا بوو سه‌ر ملێن وێ
خه‌ونا من رێڤینكه‌ك ژ ئه‌زه‌ل به‌ر ب ئه‌به‌د بوو
گولدانه ل سه‌ر مێزا ئه‌یوانا په‌یڤا وێ
ئوو شه‌ڕڤانێن رۆما هاتن..
گه‌نم سۆتن و
مه‌ژ دۆتن و
هه‌ر هه‌سته‌كا ڤه‌شارتی مای، ب په‌نجێن تیژ ڤه‌رۆتن
هه‌كو گوڕیا مه‌نجه‌نیقێ وه‌ك بارانێ ل مه دباری،
ئه‌وێ بازرگان نه‌نیاسی و
ئه‌م هه‌ردو ئێخستین ئه‌ردی
هزره‌تا مه قورچه‌ك ئاڤێ…
ته‌ڤ رووبارێن وی ل كۆگایێ عمباركرین
تێرا نه‌كر كو فڕه‌كا ئاڤێ ب تنێ، ژێ ڤه‌گرین
ئوو ئه‌م هه‌ردو ب هه‌ڤڕا مرین.
ئه‌و بۆ خیزێ ئالفێ بای
ئه‌ز ژی بوومه دڕیچیچه‌ك ب خیزیڤه مای
هه‌ر رێبوارێ ل به‌ر من راستا.. بۆ ڤه‌دگێرم
ڤێ سه‌رهاتیا زه‌نۆبیایێ و
بازرگانێ وێ یێ په‌رلاخ
ئه‌گه‌ر ئه‌ڤ شعره نه‌بایه،
ئه‌و د ناڤ ناڤان دا نه‌بوو
ئه‌ز ژی یێ بوویم هێمایه‌كێ روحا چرای
ل جه‌رگێ بیابانێ ڤه‌گۆ.
