زه‌هرا ئحسان: راگه‌هاندن بوویه پشكه‌ك ژ ژیانا من
سێمێل، دلڤین ره‌شید:
زه‌هرا ئحسان، ئاماده‌كار و پێشكێشكارا به‌رنامێ سیناهی ل كوردستان تیڤی، د دیداره‌كێ دا بۆ رۆژناما ئه‌ڤرۆ گۆت: ئه‌ز ژدایكبوویا سالا 1988مه، ده‌رچۆیا كولیژا زانستێن سیاسی مه، نێزیكی ساله‌ه‌كێ یه هاتیمه دناڤ بوارێ راگه‌هاندنێ دا، ده‌ستپێكا من ل كه‌نالێ (ئه‌ی تیڤی) بوو كو بۆ ده‌مێ سێ هه‌یڤان ل وێرێ كاركریه. به‌لێ نوكه راگه‌هاندن بوویه پشكه‌ك ژ ژیانا من و نه‌شێم ده‌ستان ژێ به‌رده‌م، چنكو كلیلا سه‌ركه‌فتنا مرۆڤی ئه‌وه ئه‌م ب حه‌ز و ڤیانا خوه بچینه دناڤ كارێ راگه‌هاندنێ، راسته كاركرن د راگه‌هاندنێ دا بۆ ئافره‌تان یێ ب زه‌حمه‌ته و هێشتا ئاسته‌نگێن جڤاكی هه‌نه، به‌لێ دڤێت ئافره‌ت خۆ راگریت و خودان ئیراده بیت داكو بشێت وان ئاسته‌نگان ده‌رباز بكه‌ت، چنكو چ جوداهی نینه دناڤبه‌را هه‌ردو ره‌گه‌زاندا دكارێ راگه‌هاندنێ دا.
هه‌روه‌سا گۆت: پشته‌ڤانێن من یێن سه‌ره‌كی خێزانا منن و ئه‌ز بخۆژی بووم، له‌ورا داخواز من ژ هه‌ر ئافره‌ته‌كێ ئه‌وه چو جاران ده‌ستان ژ خه‌ونێن خوه نه به‌رده‌ن و زێده‌تر كاری ل سه‌ر هیڤیێن خوه بكه‌ن و هه‌كه ئه‌م د به‌رده‌وامین دێ گه‌هینه ئارمانجێن خوه.
