زۆمێن زەلامێ باژێری
سالح دۆسكی
(1)
دیمەنەك سینەمائی
بۆ (ماریانا باخامیر)ێ.. وهەمی كەیسیێن وكهەڤی وێ..
د ژۆرا دادگەهێ ڤە، نەهێلا دادوەر بریارا دوماهیێ تەمام كەت، ئەو هەفت فیشەكێن ژ دەمانجا وی دەركەفتین هەمی پێرابوونێن یاسای ڤەبڕین.
(2)
باج
دەمێ ئەوی زەلامێ شێست سالی، یێ بەژن كورت و زك مەشك و كەچل، كوستیل دكرییە تبلا وێ كچە نێركزا چاردە سالی، گەلەك كەیفا وێ ب وان كێك و شریناهیان دهات.. نەخاسمە فیستانێ سپی یێ بویكانیێ.. رەبەنێ نە دزانی كفنێ وێ یە بۆ كەركری.
(3)
نیاز
وەسیەتكربوو ل سەر گۆڕێ وی بنڤیسین: «ل ڤێ دەرێ، زەلامەكە بوو، وەكی تە حەز ژ ژیانێ دكر»… لێ ل زڤستانا ئێكێ بارانێ ب پەیڤا ئێكێ ژ وێ رستەیێ بر.
(4)
نۆستالیژییا
پشتی تووشی گڤاشتنێن دەروونی بووی ئێدی نەشیا بنڤیت، خەورەڤینكێ نیڤا جانێ وی گرتبوو، هزرا خۆ كر، گەهشت وێ ئەنجامێ كو تەختەكێ وەكی لاندكێ بدەت چێكرن دا بشێت بنڤیت، لێ د جهدا بیرا دایكا وی وەكی فۆلكانەكا ئاگری خۆ ب خەریبییا وی دا وەكر و بنێ دلی وی گرت، بۆ دەنگەك كویر و نزم : مانێ لاندكێ بخۆ تو نە دهەژاندی.
