زیاد ئه‌حمه‌د: گرنگ سه‌ركه‌فتنه نه‌ك گۆلكه‌رێ تیمێ
ئه‌ڤرۆ،
ب گۆلا هێرشبه‌رێ خوه زیاد ئه‌حمه‌د تیما یانا زاخۆ شیا سه‌ركه‌فتنه‌كا گرنگ ل سه‌ر مێڤانا خوه یانا حدوود یا به‌غدایی بینت د یاریا وان دا ئه‌وا ل ئه‌ینیا بوری ژ چارچووڤێ هه‌ڤڕكیێن گه‌ڕا 26ێ ژ خولا پلا نایابا عیراقێ ل یاریگه‌ها زاخۆ یا نێڤده‌وله‌تی هاتیه كرن، بڤێ ئه‌نجامێ تیما یانا زاخۆ شیا پێشڤه بهێته رێزا شه‌شێ ب 38 خالان ئه‌وا یانا جه‌ویه ب 59 خالان سه‌رێ لیستێ دهێت.
ژلایه‌كێ دیڤه یانا هه‌ولێرێ به‌رده‌وامی دا ئه‌نجامێن خوه یێن لاواز پشتی ل گه‌ل مێڤانا خوه یانا نه‌جه‌ف ب گۆله‌كێ وه‌كهه‌ڤبووی كو د بیته وه‌كهه‌ڤییا 11ێ یانا پایته‌ختێ كوردستانێ د خولێ دا تۆمار دكه‌ت و ب 30 خالان پاشڤه‌چوویه رێزا 12ێ.
د داخویانیه‌كێدا بۆ رۆژناما ئه‌ڤرۆ هێرشبه‌رێ یانا زاخۆ زیاد ئه‌حمه‌د كه‌یفخووشیا خوه دیاركر كو شیا سێ خالێن گرنگ بۆ تیما خوه بده‌ستڤه‌ئیناین و گوت: یانا حدوود ب هه‌موو هێزا خوه یاری دكر ژبه‌ركو گه‌ڤێن داكه‌فتنێ لسه‌ر هه‌نه لێ ئه‌م ژی رژدبووین بۆ سه‌ركه‌فتنێ د ناڤ ئه‌ردێ خوه‌دا بینین و گه‌شبینم بۆ یاریێن داهاتی به‌رده‌وامیێ ده‌ینه ئه‌نجامێن باش و به‌ره ب رێزێن باشتر چین و كه‌یفخووشم هه‌تا نوكه حه‌فت گۆل ژی من تۆماركرینه.
هه‌روه‌سا ناڤهاتی گوت: هه‌ر یاریه‌كا ئه‌م دكه‌ین وه‌كو تیمه‌كا ئێك دل و ئارمانج چینه دناڤ یاریگه‌هێ دا، هه‌رچه‌نده هێرشبه‌رێ تیمێ مه لێ بوو من گرنگ نینه گۆلكه‌رێ تیمێ بم به‌لكو سه‌ركه‌فتنا تیمێ د هه‌ر یاریه‌كێ دا گرنگه و هاریكاریا هه‌ڤالێن خوه دكه‌م ژبۆ تۆماركرنا گۆلان پێخه‌مه‌ت سه‌ركه‌فتنان.
