زیانڤێكەفتیێن لەهیا زاخۆ دێ هێنە قەرەبووكرن
زاخۆ، دلۆڤان هالۆ:
ئەدیب جەعفەر، ڕێڤەبەرێ ناوچەداریا ڕزگاری ل ئیدارەیا سەربخوە یا زاخۆ دیار كر كو ل گورەی شیانێن حكومەتا هەرێما كوردستانێ و ئیدارەیا سەربخوە یا زاخۆ، ب ڕێكا لیژنەیەكا تایبەت ژ ئیدارەیا سەربخوە یا زاخۆ وەلاتیێن زیانڤێكەفتیێن لەهیا زاخۆ دێ هێنە قەرەبووكرن.
ڕێڤەبەرێ ناوچەداریا ڕزگاری خویا ژی كر كو ئەڤ لیژنە ژ تیمێن ئیدارەیا سەربخوە یا زاخۆ و باژێڕڤانیا زاخۆ و بەرگریا شارستانی یا زاخۆ پێك دهێت و گۆت: «ئەڤ لیژنە ل دەمێ لەهیێ ل هانا خەلكی چوو، ئەوا د شیانێن وان دا هاتە كرن، ئەڤ لیژنە ل سەر پاقژكرنا ڕێك و ئاڤڕێژان یا بەردەوامە».
دهێتە زانین، ژ ئەگەرێ بارانێن زۆر و بهێز ل سنۆرێ ئیدارەیا سەربخوە یا زاخۆ ل چەندین گەرەك و گوندان لەهی چێبوون و ئەڤ لەهیە بوونە ئەگەر زیان ب چەند مال و ترۆمبێلان بكەڤیت.
