زیبا ته‌ها: ئه‌ڤ ساله پڕۆژەیێن ساخله‌میێ بۆ ئافره‌تان دێ مه هه‌بن
سكرتێرا ئێكه‌تیا ئافره‌تێن كوردستانێ ئاماژه پێ كر كو سالا بۆری چه‌ندین چالاكی هاتینه ئه‌نجامدان و گۆت: ئه‌ڤ ساله دێ خزمه‌تێن زێده‌تر پێشكێشی ئافره‌تا كوردستانێ كه‌ین و چه‌ندین پڕۆژه و پلان هه‌نه ژ وان ژی ئه‌ڤ ساله مه پڕۆژێ ساخله‌می بۆ ئافره‌تان دێ هه‌بیت.
زیبا ته‌ها، سكرتێرا ئێكه‌تیا ئافره‌تێن كوردستانێ بۆ رۆژناما ئه‌ڤرۆ دیار كر، ئێكه‌تیا ئافره‌تێن كوردستانێ ئێكه ژ وان رێكخراوێن به‌رده‌وام خه‌بات بۆ ب ده‌ستڤه‌ئینانا مافێن ئافره‌تێ كریه و ئه‌زموونه‌كا درێژ یا كاركرنێ هه‌یه و گۆت: ( ئێكه‌تیا ئافره‌تان پلان و به‌رنامه‌یێن خۆ ل سه‌ر بنه‌مایێن زانستی هه‌نه بۆ چاره‌سه‌ركرنا ئاریشه‌یێن ئافره‌تێ و خزمه‌تكرنا وان و هنده‌ك خزمه‌ت هه‌نه سالانه د به‌رده‌وامن و ناهێنه گۆهۆڕین).
سكرتێرا ئێكه‌تیا ئافره‌تێن كوردستانێ دا زانین كو سالا بۆری 2024ــێ ئێكه‌تیا ئافره‌تێن كوردستانێ پشتی ئه‌نجامدانا كۆنگرێ خۆ ده‌ست بكاری كریه وه‌ك ستافێ نوو، كۆنگره ژی ویستگه‌هه‌كێ گرنگه بۆ پێداچوونێ ب به‌رنامه و پلانێن رێكخراوا ئێكه‌تیا ئافره‌تان و گۆت: (ئه‌م شیاینه سالا بۆری چالاكیێن زێده‌تر ئه‌نجام بده‌ین، چونكه ستافه‌كێ گه‌نج و خودان باوه‌رنامه ده‌ست بكاری كریه و ملێ خۆ دایه به‌ر ئه‌نجامدانا چالاكی و پڕۆژێن جور ب جور).
زیبایێ د به‌رده‌وامیا ئاخفتنێن خۆدا گۆت: (بتنێ ل سالا بۆری ئه‌م شیاینه نێزیكی 300 خۆلین پیشه‌یی رێڤه ببه‌ین كو تێدا نێزیكی 12 هزار ئافره‌تان مفادار بووینه، خۆلێن ئێكه‌تیا ئافره‌تان ژی هه‌موو گرێدایی ژیان و ژیارا ته‌خا ئافره‌تایه و ل سه‌ر ده‌ستێ كه‌سێن شاره‌زا راهێنان دیتیه، هه‌روه‌سا چه‌ندین پیشانگه‌هـ بۆ ناساندن و ب بازاڕكرنا به‌رهه‌مێ ئافره‌تێ هاتینه ڤه‌كرن).
سكرتێرا ئێكه‌تیا ئافره‌تێن كوردستانێ گۆتژی: (هه‌ر ل سالا بۆری 2024ـێ ئێكه‌تیا ئافره‌تێن كوردستانێ شیایه كار لسه‌ر 95 باده‌كێن ئافره‌تێ بكه‌ت یێن توندوتیژی هه‌مبه‌ر هاتیه ئه‌نجامدان، بسه‌دان خۆلێن هشیاركرنێ هاتینه ئه‌نجامدان، ئه‌ڤ ساله ژی دێ هه‌ر چالاكیێن ئێكه‌تیا ئافره‌تان د به‌رده‌وام بن و بڕیاره زۆرترین خۆلێن پیشه‌یی و ره‌وشنبیری بۆ ئافره‌تا بهێنه ڤه‌كرن).
زیبایێ زێده‌تر گۆت: (د بیاڤێ ساخله‌میێ دا دێ مه پڕۆژه بۆ ئافره‌تێ هه‌بن، هه‌روه‌سا ل گوره‌ی پلانا مه دێ كار كه‌ین بۆ هشیاركرنا جڤاكی لدور مه‌ترسیێن توندوتیژیێ و شیره‌تكار و پشته‌ڤانیێن قانوونی و جڤاكی دێ هێنه پێشكێشكرن بۆ ئافره‌تان، هه‌روه‌سا دێ گڤاشتنێن خۆ هێشتا زێده كه‌ین ژبۆ زێده‌تر پشكداریا سیاسیا ئافره‌تێ و بلندكرنا پله‌یێن وان د ئاستێن جیاوازدا، گرنگیدان ب هه‌ستا نه‌ته‌وه‌یی و نیشتیمانی ئێكه ژ پڕۆژێن ئێكه‌تیا ئافره‌تێن كوردستانێ بۆ پێگه‌هاندنا نفشه‌كێ نیشتیمانپه‌روه‌ر).
