زیرەكیا چێكری نەشێت جهێ هەستێ وێنەگری بگریت
بێوار حەمدی:
وێنەگر (رێبەر تەمەر) كو نوكە ل كەنالێ (ئاڤا میدیا) كاردكەت، د دیدارەكێ دا بۆ رۆژنامەیا ئەڤرۆ گۆت: حەزژێكرنا من بۆ كارێ وێنەگریێ بۆ بەری چەندین سالان دزڤڕیت، لێ بەری سێ سالان دەلیڤە ب دروستی هات و نوكە ل كەنالێ ناڤهاتی كاردكەم و كارێ من وێنەكرنا راپۆرت و نووچە و روودانێن جودا جودا و فیچەرێن تایبەتە و دلخۆش و ئارامم ب كارێ خۆ.
هەروەســــــــــا گـــــــــۆت: فێربوونا من بۆ كارێ وێنەگریێ ژ شكەستنان دەستپێكر، ئانكو هەر جارەكا وێنەیەكێ من تێك دچوو من دگۆت چ نینە ئەڤە ستایلەكێ نوویە، لێ دناخێ خۆدا من دزانی كو هێشتا گەلەكا مای ئەز باشتر لێ بهێم و ب دیتنا من داكو وێنەگرێ سەركەفتی بیت پێدڤیە ئەڤ هەرسێ تشتە ل دەف هەبن (چاڤەكێ جیاواز، هەدارەكا درێژ، كامیرەیا وی وەكو پارچەیەكا جەستەیێ وی بیت) راستە زیرەكیا چێكری د كوالێتیا دەنگ و ڕەنگان دا گەلەك هاریكاریا مە دكەت، لێ چ جاران نەشێت جهێ هەستێ وێنەگری بگریت، ئەوێ ل نیڤەكا روودانێ ڕاوەستیایی و ب چاڤەكێ مرۆڤانە وێنەی دگریت، لێ ئەز حەزدكەم هەر یێ بەردەوامبم ل سەر فێربوونا تەكنولۆژیایا نوو د جــــــــــــــیهانا وێنەگــــــــــــــــــریێ و سینەمایێ دا.
