زێده‌تری شه‌ش ملیار دولاران وه‌به‌رهێنان ل دهۆكێ دهێته كرن
ئه‌ڤرۆ، ئه‌میر ئه‌ترووشی
رێڤه‌به‌رێ گشتیێ وه‌به‌رهێنانێ ل پارێزگه‌ها دهۆكێ راگه‌هاند، ژ سه‌رجه‌مێ پرۆژه‌یێن وه‌به‌رهێنانێ، 74 پرۆژه ب دووماهی هاتینه و پرۆژه نه‌هاتینه راگرتن و به‌رده‌وامن د ئه‌نجامدانێ دا و 36 پرۆژه ژی ژ ئه‌نجامێ نه پێگیریا وه‌به‌رهێنه‌ران هاتینه هه‌لوه‌شاندن و گۆت: رێژه‌یا هه‌ره بلند یا بجهئینانا پرۆژه‌یێن وه‌به‌رهێنانێ ل سنوورێ قه‌زا سێمێلێ نه كو 113 پرۆژه‌یێن وه‌به‌رهێنانێ ل وێ قه‌زایێ هه‌نه و ل دهۆكێ 100 پرۆژه‌یێن وه‌به‌رهێنانێ هه‌نه.
كوردو ئیحسان، رێڤه‌به‌رێ گشتیێ وه‌به‌رهێنانێ ل پارێزگه‌ها دهۆكێ بۆ رۆژناما ئه‌ڤرۆ دیار كر، نها ل پارێزگه‌هێ 284 پرۆژه‌یێن وه‌به‌رهێنانێ ب سه‌رمایێ شه‌ش ملیار و 500 ملیۆن دولاران دهێنه جێبه‌جێكرن و گۆت: ژ ڤان پرۆژه‌یان 10 پرۆژه بیانی نه و پێنچ پرۆژه هاوبه‌شن و یێن دی ژی وه‌به‌رهێنانا ناڤخۆیی یه.
ناڤبری زێده‌تر دبێژیت: رێژه‌یا هه‌ره بلند یا بجهئینانا پرۆژه‌یێن وه‌به‌رهێنانێ ل سنوورێ قه‌زا سێمێلێ نه كو 113 پرۆژه‌یێن وه‌به‌رهێنانێ ل وێ قه‌زایێ هه‌نه و ل دهۆكێ 100 پرۆژه و ل ئیدارا سه‌ربه‌خۆ یا زاخۆ ژی 36 پرۆژه‌یێن وه‌به‌رهێنانێ هه‌نه. ل ئامێدیێ 14 پرۆژه و ل ئاكرێ 11 پرۆژه و ل به‌رده‌ره‌ش نه‌هـ پرۆژه و ل شێخان ژی ئێك پرۆژه‌یێ وه‌به‌رهێنانێ هه‌یه.
رێڤه‌به‌رێ گشتیێ وه‌به‌رهێنانێ ئاماژه دا وێ چه‌ندێ ژی، ژ بۆ زێده‌تر گه‌شه‌یا وه‌به‌رهێنانێ ل پارێزگه‌ها دهۆكێ، رێڤه‌به‌ریا مه پرۆفایلێ وه‌به‌رهێنانێ ل سه‌ر ئاستێ قه‌زایان ئاماده‌كریه، بۆ هندێ پرۆژه ل گۆره‌ی پێویستیا خه‌لكی و ده‌ڤه‌رێ پرۆژه بهێنه مۆله‌ت دان و ئه‌م بشێین وه‌به‌رهێنانێ دابه‌ش بكه‌ین و ئه‌و ده‌ڤه‌رێن كێمتر پرۆژه‌یێن وه‌به‌رهێنانێ لێ هه‌ین و پێدڤیا ده‌ڤه‌رێ پێ هه‌بیت، پرۆژه لێ بهێنه ئه‌نجامدان.
خویاژی كر كو ژ سه‌رجه‌مێ پرۆژه‌یێن وه‌به‌رهێنانێ، 74 پرۆژه ب دووماهی هاتینه و پرۆژه نه‌هاتینه راگرتن و به‌رده‌وامن د ئه‌نجامدانێ دا و 36 پرۆژه ژی ژ ئه‌نجامێ نه پێگیریا وه‌به‌رهێنه‌ران هاتینه هه‌لوه‌شاندن و ئه‌م كار ل سه‌ر هندێ دكه‌ین پرۆژه‌یێن گرنگ بهێنه ئه‌نجامدان كو خه‌لك خوه تێدا ببینیت و مفای ژێ وه‌رگریت، وه‌كو پاركا گشتی یا دهۆكێ و پرۆژه‌یێن گه‌شتیاری و ل قه‌زا به‌رده‌ره‌ش و شێخان پرۆژه‌یێن چاندنێ دێ گرنگی پێ هێته دان و هژماره‌كا پرۆژه‌یێن دیتر و گۆت ژی: هه‌ولێن مه ئه‌ون ژێرخانا ئابووری یا هه‌رێما كوردستانێ بهێز بكه‌ڤیت.
