زێدهكاڤیێن ل سهر سكرێ دهۆكێ دهێنه راكرن
دهۆك، لهزگین جوقی:
رێڤهبهرێ سكرێ دهۆكێ دیار كر بڕیار هاتهدان ههموو زێدگاڤیێن ئاڤێ ل سهر سكرێ دهۆكێ بهێنه راكرن، ژ بهر كێمبوونا ئاستێ ئاڤێ د سكرێ دهۆكێ دا، چونكو سكرێ دهۆكێ شیانێن عمباركرنا 52 ملیۆن مكهعبێن ئاڤێ ههیه و نوكه ب تنێ 19 ملیۆن و 500 هزار مكهعبێن ئاڤێ تیدا ماینه.
فهرهاد محهمهد تاهر، رێڤهبهرێ سكرێ دهۆكێ راگههاند: “ب نڤیسارهكا فهرمی پارێزگارێ دهۆكێ ل سهر راكرنا ڤان زێدهگاڤیێن ئاڤێ هاتیه ئاگههدار كرن، كۆمبوونهك ژی هاتیه كرن بۆ بڕیاردانێ ل سهر راكرنا زێدهگاڤیێن ئاڤێ ل سهر سكرێ دهۆكێ، دیسا كۆمهكا پێشنیاران هاتینه كرن و لژنهك هاته دروستكرن ب سهرۆكاتیا جێگرێ پارێزگاری دهۆكێ و پۆلیس و رێڤهبهرێ ناوچهداریا زاویته و دهڤهردارێ دهۆكێ و رێڤهبهریا ئاڤێ، بڕیار هاتیه دان ههتا رۆژا 1/9/2022ێ ههموو خودانێن هێلێن ئاڤێ یێن ژ سكرێ دهۆكێ برین بهێنه ئاگههداركرن كو زێدهگاڤیان راكهن و نههێلن، ههكه نه دێ بهرپرسیار بن”.
ئاشكرا ژی كر كو ههتا نوكه ب تنێ 28 كهسان ژ وان یێ ئاڤ ژ سكرێ دهۆكێ كیشای ناڤێن خوه تۆماركرینه و گۆت: “ئهم پیشبینی دكهین پتر ژ 100 كهسان ههبن ب شێوهیهكێ زێدهگاڤی ئاڤ ژ سكرێ دهۆكێ كێشا بیت و نوكه ئهم پێڤه مژوولین وان زێدهگاڤیان راكهین”.
