زێدەبوونا بەرازان ل دێرەلۆكێ كارتێكرن ل سەر زەڤیێن برنجی كریە
پشتی گەهشتنا دەرامەتێ جوتیارێن سنورێ ناوچەدارییا دێرەلۆك رەڤدێن بەرازا ب شەڤانە قەستا چەمێن دەڤەرێ دكەن و زیانێن مالی دگەهیننێ، ئەڤێ یەكێ ژی كارتێكرن كریە سەر بەرهەمێن چاندنێ.
ژ بۆ رێكگرتنێ ژ هاتنا بەرازان و پاراستنا دەرامەتێ خوە، جوتیارێن دەڤەرێ چەندین رێكاران بكار دئینن، بۆ وێ یەكێ تا رادەیەكێ بشێن زیانێن دگەهیننە دەرامەتێ وان كێم بكەن ، مینا داڤان و تەقتەقوشكان و ڤەدانا هەلامەتان و چەندین رێكێن دیتر، لێ تشتێ ئەڤ سالە بەربەلاڤ ئەڤان سالێن داویێ جوتیارێن دەڤەرێ ئەنجام ددەن، پەرژانكرنا بیستان و زەڤیانە ب نایلونێن تەیسوك و تێلێن قایم و هەروەسا دانانا گلۆپێن شەحنێ یێن سمارت و چوونا شەڤانە یا ب نوبەت ل بەر چەمی.
د ڤێ دەربارێ دا جوتیارەكی بناڤێ حسێن هاریكی دیار كر، شەڤانە بەراز دكەڤنە چەمێ وانا و چو تێ ناهێلن، ب تایبەتی ژی زەڤیێن برنجی و گۆت: ئەو بارا پترێ ب شەڤێ دچنە چەمی و ب نوبەت ل بەر بەرازان د راوەستن، دا كو بەراز نەكەڤنە چەمێ وانا و ب تایبەت زەڤیێن برنجی و ئەو شەڤا ئەو نەهێت ژی فانوسكا رۆناهییێ ل بەر برنجی ڤەدەن دا بەراز خوە نێزیكێ دەرامەتێ وانا نەكەن.
جوتیارەكی دی ب ناڤێ مەهدی سلێمان خۆیاكر، گەلەك رێیێن دی هەنە مرۆڤ بشێت بەرازا ل چەمی دوور بكەت بێ ب كارئینانا چەكی یان كوشتنا وان، چونكە ب كارئینانا چەكی و كوشتنا وان ب شەڤێ یا ب مەترسیە و هەروەسا قەدغەیە ژی و چێدبیت ببیتە ئەگەرێ دروست بوونا روودانا.
ئەندازیار عسمەت ئیبراهیم بەرپرسێ هۆبا چاندنێ ل دێرەلوكێ دڤێ دەربارێ دا دبێژیت: (ئەڤ سالە هەژمارەكا زۆرا جوتیاران برنج ل چەمێن سنورێ دەڤەرێ چاندینە و ب رەنگەكی دیار ژی بەراز حەز ژ زەڤیێن برنجی دكەت بۆ دابینكرنا خارنا خوە، ژ بەر وێ یەكێ بارا پترێ ژ زەڤیێ برنجی یێن دەڤەرێ تووشی رەڤدێن بەرازان دبن، ب تایبەتی ژی ئەو زەڤیێن نەهاتینە پەرژانكرن كو نوكە دەمێ گەهشتنا بەرهەمێ برنجی و كونجیانە).
