زێدەتری 275 هزار وەلاتیێن عەرەب ل پارێزگەها دهۆكێ دژین
ئەڤرۆ
ئەڤرۆ، ئەمیر ئەترووشی:
قوتابیەكێ ماستەرێ ل زانكۆیا سلێمانیێ راگەهاند، ، 16% ژ خوەجهێن هەرێمێ د نوكەدا عەرەبن، د 10 سالان دا 11% رێژەیا عەرەبان ل هەرێمێ زێدەبوویە و پێشبینی دهێنەكرن د 15 سالێن بهێت دا رێژەیا عەرەبان ل هەرێمێ بگەهیتە 25%ێ و گۆت: نها ل پارێزگەها دهۆكێ 275 هزار عەرەب نوكە ئاكنجی بووینە و ژ ڤێ رێژەیێ ژی 26.5% عەرەبێن ل هەرێمێ ل پارێزگەها دهۆكێ نە.
گەرمیان محەمەد، قوتابیەكێ ماستەرێ ل زانكۆیا سلێمانیێ پشكا جوگرافیێ بۆ ئەڤرۆ دیار كر، د نوكەدا ل هەرێما كوردستانێ زێدەتری ملیون عەرەب لێ خوەجهـ بووینە و ب ڤی رەنگی ل سەر سێ پارێزگەهان دابەشبوونە، ل پارێزگەها هەولێرێ 600 هزار عەرەب لێ خوەجهـ بوونە و سەرجەمێ گشتی یێ وان عەرەبێن ل هەرێمێ ل پارێزگەها هەولێرێ نە كو ب رێژەیا 58% ژ عەرەبێن ل كوردستانێ دژین ل هەولێرێ نە و ب ڤێ چەندێ ئاشكرا دبیت كو ب رێژا سەدێ 29 ئاكنجیێن پارێزگەها هەولێرێ عەرەبن و ژمارەیا وان عەرەبێن ل هەولێرێ پترە ژ ژمارەیا عەرەبان ل كەركووكێ.
ئاماژە دا وێ چەندێ ژی، رەنگە د ماوێ 15 سالێن بهێت دا ژمارەیا عەرەبان بگەهیتە نێزیكی 900 هزاران و رێژەیا وان ببیتە 30% ژ خوەجهێن هەولێرێ.
گەرمیان محەمەد، قوتابیەكێ ماستەرێ ل زانكۆیا سلێمانیێ پشكا جوگرافیێ خویاژی كر كو نها ل پارێزگەها دهۆكێ 275 هزار عەرەب نوكە ئاكنجی بووینە و ژ ڤێ رێژەیێ ژی 26.5% عەرەبێن ل هەرێمێ ل پارێزگەها دهۆكێ نە و ب ڤێ چەندێ ژی ئاشكرا دبیت كو 16% ژ خوەجهێن پارێزگەها دهۆكێ عەرەبن و پێشبینی دهێتەكرن د 15 سالێن بهێت دا ژمارا وەلاتیێن عەرەب ل دهۆكێ بگەهیتە 420 هزار كەسان.
خویاژی كر، ل پارێزگەها سلێمانیێ ژی نها 160 هزار كەسێن عەرەب لێ ئاكنجی بووینە و 16% ئەو عەرەبێن ل هەرێما كوردستانێ دژین ل پارێزگەها سلێمانیێ نە كو دبیتە 7% رێژا خوە جهێن سلێمانیێ د نوكەدا عەرەبن و رەنگە د 15 سالێن بهێت دا ل گۆرەی پێشبینیان هژمارا وان بگەهیتە 300 هزاران و رێژەیا وان بگەهیتە 14% ژ ئاكنجیێن سلێمانیێ.
ناڤبری ئەو یەك ژی نە ڤەشارت، 16% ژ خوەجهێن هەرێمێ د نوكەدا عەرەبن، د 10 سالان دا 11% رێژەیا عەرەبان ل هەرێمێ زێدەبوویە و پێشبینی دهێنەكرن د 15 سالێن بهێت دا رێژەیا عەرەبان ل هەرێمێ بگەهیتە 25%ێ.
ل دور ئەگەرێن زێدەبوونا رێژەیا عەرەبان ل هەرێما كوردستانێ شارەزایێ جوگرافیێ دیار كر، كومەك سەدەمان هەنە وەلاتیێن عەرەب بەرێ خوە بدەنە هەرێما كوردستانێ، ئێمناهی ئێك ژ وان ئەگەرانە، هەروەسا ل ڤێ دووماهیێ ژی پشتی یاسایا تەملیككرنێ كار پێ هاتیكرن، عەرەبان زێدەتر بەرێ خوە دایە هەرێما كوردستانێ.
قوتابیەكێ ماستەرێ ل زانكۆیا سلێمانیێ دیار كر كو بەری نوكە هەمی ئەو عەرەبێن ل هەرێمێ كرێچی بوون، كرێچی ڕەنگە بەردەوام ل رێیەكێ بگەریت و ڤەگەریت، بەلێ نوكە پتر عەرەب یێ مولكان دكرن و ئەو بەردەوام یێ زێدەدبن، د بەرامبەر دا بەردەوام وەلاتیێن هەرێمێ یێ وەلاتێ دهێلن، چونا خەلكێ مە بۆ دەرڤە ئەم دوجارا دێ باجێ دەین، جارەكێ كومەك شیانان ئەم یێ ژ دەستددەین و یا دی ژی ل جهێ وان وەلاتیەكێ نە كورد یێ جهێ وی پردكەت و بگرە یێ ملك و ئەملاكێن وی ژی دكریت.
زێدەتر دبێژیت: هزربكە 15 سالێن دی 25% خوەجهێن هەرێمێ دێ بنە عەرەب، ل وی دەمی دێ نەچاربین زمانێ دویێ ل هەرێمێ بكەینە عەرەبی و قوتابخانێن تایبەت بۆ وان ڤەكەین و كولیژێن تایبەت و نەخوشخانێن تایبەت و پشكداربكەی د حكومەتێ دا، ئەڤە مەترسیەكا مەزنە.
