زێدەتر ژ دو ملیۆن ترومبێلان ل هەرێما كوردستانێ هاتینە تۆماركرن
هەولێر، قائید میرۆ:
بەرپرسەكێ هاتنوچوونا هەرێما كوردستانێ ئاشكرا كر، ل سەرانسەری هەرێما كوردستانێ زێدەتری دو ملیۆن ترومبێلان هاتینە تۆماركرن و دبێژیت: پشتی دانانا سیستەمێ كامیرەیێن كۆنترۆلكرنا لەزاتیێ رێژەیا مرنێ ب روودانێن هاتنوچوونێ كێم بوویە.
عەمید ئەسعەد كەریم، بەرپرسێ ئامارێ ل رێڤەبەریا گشتیا هاتنوچوونا هەرێما كوردستانێ بۆ رۆژناما ئەڤرۆ دیاركر، ل هەرێما كوردستانێ زێدەتری دو ملیۆن ترۆمبێلان هاتینە تۆماركرن و گۆت: «پشتی دانانا كامیرەیێن چاڤدێریا لەزاتیا ترومبێلان، كاریگەری ل سەر روودانێن هاتنوچوونێ هەبوویە، چونكی بەری كامیرەیێن كۆنترۆلكرنا لەزاتیێ بهێنە دانان، ل سالا 2018ێ زێدەتری 625 كەسان ب روودانێن هاتنوچوونێ گیانێ خۆ ژ دەست دابوو، بەلێ ل سالا بۆری 2024ێ ئەڤ رێژە كێمبوو بۆ 425 قوربانیان».
عەمید ئەسعەد گۆتژی: «گەلەك ئەگەر بۆ كێمبوونا رێژەیا قوربانیێن هاتنوچوونێ هەنە، بەلێ ئەگەرێ سەرەكی بۆ دانانا كامیرەیان ڤەدگەڕینین، ب تایبەتی كامیرەیێن خال ب خال كاریگەریێن خۆ هەبووینە كو شۆفێر لەزاتیێ كێم بكەن و ل گورەی ستانداردێ هاتیە دیاركرن بۆ هەر جادەكێ هاتنوچوونێ بكەن، هێشتا رێژەیا قوربانیان گەلەكە، بەلێ هەڤبەركرن ل گەل بەرێ كێمبوویە».
