زێدەتر ژ 700 هزار وەلاتی ژ پشكا ئاهێن خوارنێ دهێنە بێ بەهركرن
دهۆك، دلۆڤان ئاكرەیی:
رێڤەبەرێ گشتییێ بازرگانییێ ل حوكمەتا هەرێما كوردستانێ دیاركر، ل ڤێ حەفتییێ دێ پشكا خوارنێ بۆ مەها شەش و پشكا ئاری یا هەشتێ ل هەرێما كوردستانێ دێ هێنە بەلاڤكرن و دبێژیت: زێدەتر ژ 700 هزار وەلاتی ژ بەر پڕ نەكرنا فۆرما ئەلیكترۆنی دێ ژ پشكا ئاری و خوارنێ بێ بەهر بن.
نەوزاد شێخ كامل، رێڤەبەرێ گشتییێ بازرگانییێ ل وەزارەتا بازرگانی و پیشەسازیێ بۆ رۆژنامەیا ئەڤرۆ گۆت: «بڕیار بۆ بەلاڤكرنا پشكا ئاری و پشكا خوارنێ دەركەفتی یە و ئەم هاتینە ئاگەهداركرن و مە دەست ب رێكارێن گرێدای بەلاڤكرنا وان كریە و د نوكە دا ل عمباران كێمییا زەیتێ و ئاڤا باجانێ هەیە، بەلێ رۆژانە شەكر و برنج و كەرەستەیێن دی دگەهنە عمباران و ئەم هاتینە ئاگەهداركرن، كو دێ زەیت و ئاڤا باجانێ ژی گەهن و دێ دەست ب بەلاڤكرنا وان كەرەستەیان هێتە كرن».
نەوزاد گۆتژی: «بڕیارا بەلاڤكرنا پشكا ئارێ گەرا هەشتێ یێ ئەڤ سالە دەركەفتییە و دەست ب بەلاڤكرنا وێ هاتیە كرن».
