زێرەڤان سالح: ب دەستڤە ئینانا باوەرنامەیا GOLD CARD دەرگەهێ قارەمانیێن نێڤدەولەتی ڤەكر
د دیدارەكا كورت دا دادڤانێ نێڤدەولەتی یێ یارییا كیك بۆكسینگێ و كوڕێ باژێرێ دهۆكێ زێرەڤان سالح كەیفخوەشیا خوە دیار كر كو ب دەستڤە ئینانا باوەرنامەیا GOLD CARD یا نێڤدەولەتی دەرگەهـ بۆ پشكداریێ د قارەمانیێن نێڤدەولەتی یێن سالا 2025ێ ڤەكر و ئەڤە ژی دەستكەفتەكە دێ بزاڤێ كەت پشكدارییان بكەت.
زێدەتر ناڤهاتی بۆ رۆژنامەیا ئەڤرۆ گۆت: دەستڤەئینانا باوەرنامەیا نێڤدەولەتی د ناڤ چەند قۆناغەكا دەرباز دبیت ژ وانا پشكداری د چەند قارەمانییەكێ دەولەتی ل سەر ئاستێ هەلبژارتییان و یانەیان د قارەمانییا وەلاتی خوە و كێشوەرێ ئاسیا بكەت ل دووماهیێ دێ لژنەیەكا تایبەت یا فدراسیۆنا یارییا كیك بۆكسینگێ هەلسەنگاندنێ و دۆڤچوونێ كەت و دەست ب دانانا خولەكا تایبەت كەت پشتی ب سەركەفتیانە دەرباز دبیت ژ نوو دێ بیتە خودان باوەرنامەیا نێڤدەولەتی و ئەڤە ژی ماوەیێ سالەكێ زێدەتر بۆ دڤێت و گۆت: د قارەمانییا سۆپەرا ئیراقێ دا ئەوا ل ئەینییا بۆری ل باژێرێ دهۆكێ هاتییە كرن وەكو باشترین دادڤانێ قارەمانیێ ژلایێ فدراسیۆنا كیك بۆكسینگا ئیراقێ هاتبوومە دەستنیشانكرن.
هەروەسان زێرەڤانی گۆت: سۆپاس بۆ خودێ كو دەلیڤە دایە من ئەز بگەهمە ئێك ژ ئارمانجێن خوە و پشتی زەحمەتەكا درێژ و كارەكێ بەردەوام ئێك ژ مەزنترین باوەرنامەیێن نێڤدەولەتی ل سەر ئاستێ یارییا كیك بۆكسینگێ GOLD CARD ب دەستڤە بینم، هەرچەندە دەمەك بۆ هاتیە دەستنیشانكرن ئەو ژی هەتا 31 دووماهییا ڤێ سالێ یە و دڤێت پشكداری من هەبن و هەكە نەبوون دێ نەچاربم جارەكا دێ ڤەگەڕیمە قۆناغا ئێكێ و دەستپێكی یا خواندنێ و پشكدارییان ژبۆ هندێ باوەرنامە ژ من نەهێتە ڤەكێشان.
ژلایەكێ دووڤە ڕاهێنەرێ نێڤدەولەتی ئەوچەندە ژی گۆت: فدراسیۆنا كیك بۆكسینگا ئیراقێ ب دەستڤە ئینانا باوەرنامەیا نێڤدەولەتی سەرسۆرمان بوو، ژبەر كو ئەوان هزر دكر هێشتا زییە بۆ من لێ ژبەر هەبوونا خالێن سەركەفتنێ و زەحمەتا من بری پێخەمەت پێشئێخستنا ئاستێ خوە شیام ب گەهمە ئارمانجا خوە، هەروەسان ئەڤچەندە بۆ من ڕێك هاتە ڤەكرن كو فدراسیۆنا ئیراقێ ب سانەهی ڕێكێ بدەتە من ئەز یاریێن مەزن یێن نێڤدەولەتی بڕێڤە ببەم، لێ ژبەركو ئیراقی دبیت ئەو شیانێن دارایی نەبن پشتەڤانییا من بكەت لەوما ژی دێ نەچاربم ل سەر كیستێ خوە یان هەكە پشتەڤانیەك ل مە بهێتە كرن.
ل دووماهیێ ناڤهاتی دیار كر ل سەر ئاستێ پارێزگەهێ بتنێ وی ب دەستڤە ئینایە ل كوردستانێ ژی دبیت ئێكێ یان دویێ بیت، بەری دو سالان ژی خولەك ڤەكرییە 50 دادڤان پشكداربوون و دادڤانێن باش ل كوردستانێ و پارێزگەهێ هەنە لێ هەكە هاریكاری نەبیت نە شێن پشكداریێ بكەن هەتا یێن جیهانی ژبەركو دادڤان ل سەر كیستێ خوە پشكداریێ دكەن و گۆت: ب ڕێیا هەوە من دڤێت سۆپاسییا پشتەڤانێن خوە بكەم هەتا گەهشتیمە ڤێ قۆناغێ ئەوژی د, ئەحمەد قاسم و سالح كەكۆ، د. عەبدوللا جەلال، مەحفۆز ئیبراهیم، خێزانا من بوویە، ب ئۆمێدم بۆ دەمێ بهێت خزمەتا پارێزگەها خوە و كوردستانێ بكەم.
