زێمارا تفەنگەکێ ژبۆ بیرەوەرییا شەهیدبوونا وەیسى بانى ١٨/١٠/١٩٧٨
عارف حیتۆ
تفەنگەکا کویفەکرى..
ل کوژیێ قولاچکا مالەکا دو ئۆدەیى
هەر ئێڤاران دکرە گرى
باى دەنگێ گریانێ دبر و
ب چیا و دۆلێن کەسکبووى وەردکر
ب روویێ ئاخێڤە دبوو داخ و
وەرزێ گولان مشتانە دکر
کوترێن عاشق.. رەف رەفە دهاتنە شینیێ
بەلگەکێ داربەڕویێ، ب دمێ سپیڤە دبرسقى و
مزگینییەکا گەهینیێ…
د چاڤێن تیروەردا سەما دکر
وەسا دیارە.. کەلا خەریبیا یارەکێ نەژبیرکرى
ل بەندەمانا هاتنێ قەیرەکرى
دئارینیت.. خریقێنێن سەقاکرى
ما چەوا دبیت تفەنگەکا گریێ دچینیت،
یان درەڤینیت.. بکەتە گرى؟!
کا رازا خوە بۆ مە بێژە و
دەردێ سالانێن دووریێ ژ مە ڕا بڕێژە:
ئەگەر قامچییان ل سەر پشتا من گورمێن بیت
بیرۆڤ دەستێن من بهنجنیت
کرم ژ برینان بزێن و مینا خوهێ،
ئاگر ژ بنکەفشێن من ڤەدەت
هەر دەستێ خوە،
ژ سەر قەپاغکا رازێن نەگۆتى راناکەم.
راز د چاڤاندا بمخمخیێن
ب هەیبەتترن کو ل بەر هەتاڤێ بحەلیێن.
… … …
هەکو هێشتا ل باوەشا وى
هێزێن تاریێ ل دۆر بیستانى خرڤە دبوون
منارە بوون!..
کەوێن کەوپڕکانێ، ل یاریگەها ڤەشارتکانێ
ب ئەنیا زەمانێ قمیایڤە سێتیرە بوون
ئاڤ شێلییە و بالاڤى زڕکێ ژبیر دکەن!
ئەو جلکێن وارگەهێ سپەهان
خوە د تەستێدا د مسمساند و
باژێرییەکێ نەئەفەندى رەز دچەراند
تیرۆژکەکا کەل ژ هەناسا بارزانى
گەهشتە سەر بانیا بانیێ و هەلوێستەک چاند:
گەر کورکەکى بداننە سەر ملێن من و
مەحفیرکێن سۆر ل بەر پێنگاڤان رائێخن
هەڤسارێ رۆژێ بدەنە ف من
ژین و مرنێ بکەنە داردەستى پەیڤا من
هەر ڤێ رێبازێ بەرنادەم.
برینێن کوور ب مرنێ دکەویێن
لێ هیبوویێن کۆلەواریێ..
خوە ل بەهەشتێ ژى نا حەویێن.
… … …
هەکو ئەهرەمەنى خەونێن ئاڤز
گەهاندینە هنداڤ نهالێ وەک مامز
گیاى رۆندک باراندن و
چیاى کەڤرێن خوە چەماندن
بلبل بەربوونە یاسینا و دلێن هێشتا نە فڕاکە
ل دۆر زێمارێ ئێوراندن
هەست کەفتن جوولە و لڤێنێ
کو بێهن کەنە رەنگێ چڕسیێ ئەڤینێ
ئەو ئەڤینا ب قوینتاخێڤە مالقبووى
کشە دکەتە مێشێن گلێشێ کۆمبوویى و
ژ رەونەقا هاروون رەشید قەرفاندن:
ئەگەر خەونێن من رویسکەن و
ناڤێ من ل سەر گویفکا پیسکەن
هەمى رووبار و هژیر و تریێ من ببەن
هەمى دیرۆک و سەربۆر و عەردێ من ببەن
هەر پەیمانا دۆستینیێ، ل ناڤبەرا..
ئەوێ کوشتى و بکوژێ وى، ئیمزا ناکەم.
هەمى تشتەک..
د لویلییا تفەنگێ ڕا شرۆڤە دبیت!
هەکو دبیتە سەرمیر و گەرما ئەیوانێ
ب دادوەریێ ربیتە دبیت
رێکا کاروانى یێن رۆژێ، ژ نوو ڤەدبیت.
… … …
ئەز بێى چەک ناچمە بەغدا
یێن بێچەک.. ل وێرێ سەپانن
دزانن و خوڕکومانى یێن خوە لێ ددانن!
… … …
زێمارەکێ کرمە تفەنگ
نێرییەکێ ل سەر زویرکێن حەمرینى جهوار
ل چەروانەکێ شین دگەڕیێت، نە گرت بیت ژەنگ
بکەتە شەبەنگ بۆ جانێن وێل و تەنگەزار
داکو هەکو گورگ خوە دخویسینتە ناڤ ئۆلى
د سەردانەچن پێ زەنگ و بەنگ.
… … …
تفەنگەکێ کرمە زێمار
ل ئۆردى یێن پار و پێرار
وەیسییەکى جانگێ خوە دانا سەر دەستى و
بۆ هنارەک ژ گۆپکێن دارێ ڤەڕەستى
دندکێن وێ ب چوار دەوران وەربوون، بوونە هزار.
***
