زێمارا گەردۆنی..
زێرەڤانێ ئۆسێ
١- پارسنگەك (فەرسەخەك) بۆ شعرێ و سەرتبلەك بۆ جەنگێ:
خەیال زارۆكەكە، هێشتا دەم شیری ددەتێ، كارێ ئێكانە یێ وەلێدكەت زارۆكینیا خوە بژیت شعرە، ئەو شعرا ژ مەودایێن نەبینرای دباریت ول جهەكێ ئەم نە نیاسین و مە نە نیاسیت دبرسقیت..
ئەم دنڤیسین دا ژ پێنگاڤا ئێكێ دەستپێبكەن، وەكی وێ جەنگا رۆژانە دەستپێدكەت.
٢- سیفرا جهان:
[نوكە] ئەڤ پەیڤا خودان دمینەیەكا ئەندازەیی یا بەرتەنگ، ژ بلی خەریبیێ چ تشتی نزانیت، خەریبی ب چەنتكێ شعرێ ڤە، كو سەفەرێ های ژێ نینە، لێ شعر وەكی بەلاتینكا ل سەر گولێ ب سڤكاتییا خوە كۆنترۆلێ دكەت.
كووراتییەكە د كێلیكا شعرێ دا، و كێلیكەكا دی سوپرایزا ژێبرنێ یە، ئەو ب سەنگترە سەرەرایی پڕبێژییێ و سەرەرای گوهدانێ.
ئەرێ نڤیسین جهنشینە یان بزاڤەكا بەردەواما نێچیركرنێ یە؟ خوینا شعرێ ژ جوگرافییەكا دوور ل سەر كاخەزێن ژەنگگرتی دبلقیت.
٣- گازیكرن
رۆناهییەكا ستێرەكا شۆڕبوویە، هەر وەكی ئیشییەكێ تری ل بیستانی گازی وی دكەت، گازیكرن ب تنێ هلبژارتنە.
گازیكرن ل چیایان چییە، دەنگ ژ بلنداهییا وان دادكەڤیت؟
ئەڤجا دەنگ ل سەر شێوەیێ تەرمەكی بلند دبیت.
٤- زێمارا گەردوونی
كلۆخ نە هەستییە، بەلكو ئاخا ئافراندێ یە ژی،
رەنگ نە هەستە، بەلكو خەندقاندنا د چاڤێن زیندیان دایە،
ملك نە عەرشە، بەلكو درەزیكەكا هەری مەزنە،
ئاشتی نە بەلگەنامەیە، بەلكو ئەردەكە بۆ هەمیایە،
جەنگ نە هەلبژراتنە، بەلكو مرنەكە هەر ژبەری هەبیت..
حەلەبچە نە باژێرە، بەلكو زێمارا گەردوونیە.
نامەیەكە ئەز ژبۆ هۆزانڤانێ كورد [شێركۆ بێكەس]ی بلند دكەم
