زەلامێ من وەکو بەرێ حەزژێ من ناکەت
ئەڤرۆ نیوز:
ژنەکا 27 سالی دلێ خوە بۆ ئەڤرۆ ڤەدکەت و دبێژیت ئەڤە 3 سالە من سەر ھەوی شوو کریە و زەلامێ من بازرگانە و مە ب ئەڤینی خێزان پێک ئینایە، لێ بەری ئەم خێزانی َپێک بینین مەرجێ ھەڤژینێ من ئەو بو کو دگەل ھەویا خوە بژیم ب ڤی مەرجی رازی بووم، ژبەرکو مە گەلەک ئێکدو دڤیا، لێ نھا و پشتی مە خێزان پێک ئینای ئاریشا من ئەوە ھەویا من حەز ژ من ناکەت و ھەرگاڤ قەرقەشا وێ یە ل گەل من و نەخۆشیا بۆ من چێدکەت ھەرچەندە ئەز گەلەک رێزێ لێ دگرم، لێ ئەڤە ماوەیەکە ئەز پوتەی ب ھەویا خوە نادەم و زەلامێ من ژی ژبەر ڤێ چەندێ تا رادەیەکێ یێ ل گەل من ھاتیە گۆھورین و وەکو بەرێ حەز ژ من ناکەت، ئەڤجا ھیڤیە بۆ من چارەیەکێ ببینن ئەز چ بکەم و ھوون چ دبێژن؟
خانما ھێژا :
ئاریشا تە نە ھند یا مەزنە، لێ دەمێ کو مرۆڤ بریارەکێ ددەت دڤێت مرۆڤ بزانیت دێ چ ل دووڤ ڤێ بریارێ ھێت و شووکرن ل سەر ھەوی ھەموو دزانن دێ ئاریشێت خوە ھەبن و بەھرا پتر ئاریشە ل رەخێ ژنان پەیدا دبن، ئەڤجا دڤێت تو خوە ل گەل ڤی کەتواری ب گونجینی، مادەم تو حەز ژ ھەڤژینێ خوە دکەی دڤێت تو ب ھەموو رەنگان ھەول بدەی یێ کەیف خوش بیت و ئەڤ ئەڤینا وە رۆژ ب رۆژ زێدە ببیت و رێزگرتنا تە بو ھەویا تە ئەڤە خالەک باشە لنک تە ئەڤ رێزا تو ل ھەویا خوە دگری ب رامانا تو یا رێزێ ل زەلامێ خوە دگری و ھندی ژ تە و ھەویا تە بھێت ب ئاوایێ دانوستاندن و شێوازەک جوان ئاریشێن خوە چارەسەر بکەن، لڤێرە دڤیت تو سیاسەتەکی بکاربینی دلێ ھەویا خوە بکری نەکو پیوە پێ نەکەی و ھەول بدە دلێ زەلامێ خوە بکرە دا کو ھوون ژیانەکا بەختەوەر پێکڤە ببورینن و پەیوەندێین خوە ھێشتا ل گەل ھەویا خوە باش بکە دا زەلامی تە پتر حەز ژ تە بکەت چۆنکو ب ئاریشێ دێ ژیانا ھەوە ھەرسێیان نەخوش بیت.
په‌يجێ دلێ خوه ڤه‌كه ل سه‌ر تۆڕا جڤاكيا فه‌يسبۆكى
