زەلام ژ ئـافـرەتان دلـپیستـرن
ژ مێژەیە پەیڤا دلپیس دناڤ خێزانێ و جڤاكێ دا دهێتە بكارئینان دناڤبەرا هەڤژینان، شارەزایەكێ جڤاكی دیار كر كو د جڤاكێ كوردەواری دا جوداهی دناڤبەرا ئافرەتێ و زەلامی دا دهێتە كرن، بەلێ لدووڤ رەوشەنبیری و كەلتورێ جڤاكێ مە زەلام ژ ئافرەتێ دلپیسترە.
ئیسماعیل عەبدولا، ڤەكولەرێ جڤاكی و بسپورێ دەروونی، د دیدارەكێ دا بۆ رۆژناما ئەڤرۆ دیار كر كو ژبلی پەیڤا دلپیس ئەم دشێین هندەك پەیڤێن دی ژی بكاربینین وەكی (دل خەلەت، یان گومان) و ئەڤ پەیڤە ژ مێژەیە دناڤ خێزانێ و جڤاكی دا هاتیە بكارئینان، ئەڤجا چ ژلایێ ئافرەتێ و خێزانا وێ ڤە یان دناڤبەرا هەڤژینان دا، ئەڤ چەندە هینگێ روو ددەت دەمێ گومان دروست دبیت.
ڤەكۆلەری گوت: (ئەڤ تێگەهێ دلپیسیێ دهێتە بكارئینان ب تایبەت ل سەر كارێن بەد رەوشتیێ چ ژلایێ زەلامی یان ئافرەتێ بیت و گەلەك جاران ئەڤ دلپیسیە یا بێ ئەگەر و بنەمایە، بەلێ دەرئەنجامێن خراب یێن هەین).
ڤەكولەری دیار كر ژی، هەر دەمێ حەز و ڤیان و ئەڤینداری بو لایێ بەرامبەر پەیدابون دلپیسی دەستپێدكەت، ژبەركو ئافرەتێ نەڤێت زەلام تێكەلیێ ل گەل چ ئافرەتان بكەت هەتا هەكە ب هەڤالینی ژی بیت و ب هەمان شێوە زەلام ژی حەز ناكەت كەس ل گەل خوشتڤیا وی باخڤیت یان هەڤالینیێ لگەلدا بكەت.
ئیسماعیل عەبدولا گوتژی: (دەمێ ئافرەت بێی دەستویریا زەلامێ خو ژ مال دەركەفت یان درەوا لگەلدا بكەت، یان زەلام خۆ ل مالا خۆ نەكەتە خودان و زاروك و هەڤژینا وی چ بها لدەف نەمینیت، ئەڤە دبنە ئەگەر كو دلپیسی دناڤ خێزانێ دا پەیدا ببیت).
ڤەكولەرێ جڤاكی و بسپورێ دەروونی ئەو چەندە ژی ئاشكرا كر كو د جڤاكی دا ئافرەت یا بن دەست و تەپە سەرە و زەلام یێ ئازادە، یان كچ نە وەكی كوریە كور یێ سەرتراشیە، بەلێ ئەڤە نە یا دروستە و دوورە ژ مروڤایەتیێ و مافێن ئافرەتان و گۆت: (خەلەتی هەر خەلەتیە ئافرەت بكەت یان ژی زەلام، بەلێ كەلتورێ جڤاكێ مە پتر پشتەڤانێ زەلامیە، لێ هەر چاوا بیت لدەڤ یاسایێ جوداهی نینە، لەوما ئەم دشێین بێژین لدووڤ نەزانین و نە رەوشەنبیریا كەلتورێ مە زەلام ژ ئافرەتا دلپیسترن).
ڤەكولەرێ جڤاكی دیار كر ژی، ژ ئەگەرێ دلپیسیێ كارتێكرنێن مەزن پەیدا دبن وەكی: جودابوونا هەڤژینان، بێ سەمیان بونا زاروكا، نەمانا باوەریێ بو ژن ئینان و شووكرنێ، كوشتن، خو سوتن، تێكچونا پەیوەندیان دناڤبەرا خێزانێن بوینە خزم، تێكچونا بارودوخێ دەرونی یێ هەڤژینان.
عەبدولا د بەردەوامیا ئاخفتنێن خۆدا دیار كر، داكو خو ژ دلپیسیێ رزگار بكەین دڤێت ئەم ئاستێ خو یێ رەوشەنبیری و جڤاكی و ئایینی بلند بكەین، هەروەسا بزاڤێ بكەین رەوشەنبیریەكا باش لدەف گەنجان و سنێلان پەیدا بكەین و ئەرك و مافێن وان بو دیار بكەین و گۆت: (هەر ژ دەستپێكا پێكئینانا هەڤژینیێ پێدڤیە هەڤژین ل گەل ئێكدو د راستگو بن و هەر تشتەكێ هەبیت سەبارەت بیرو باوەرا و حەز و ڤیانا و سالوخەتان هەتا ساخلەمیا خۆ بو ئێكدو بێژن، داكو بشێن ژیانا خۆ ل سەر بنەمایێ باوەریێ ئاڤا بكەن و دوور بن ژ دلپیسیێ و هزر كرنا خەلەت).
