زەهدی عەبدولقادر: سلامەتیا یاریزانان بۆ مە گرنگترە ژ ئەنجامدانا یارییان
رەمەزان زەكەریا
سكرتێرێ یانەیا وەرزشیا بەردەڕەش ئاشكرا كر هەرچەندە پاشئێبخستنا یاریان كارتێكرنەكا تەكنیكی یا مەزن ل سەر یانەیێ نینە، بەلێ رەوشا دارایی بوویە مەترسییەكا راستەقینە بۆ سەر پاشەڕۆژا یانەیا، لێ د رەوشا نۆكە دا بۆ مە سلامەتییا یاریزانان گرنگترە.
زێدەتر زەهدی عەبدولقادر بۆ رۆژناما ئەڤرۆ گۆت: بڕیارێن فدراسیۆنا فوتبۆلا كوردستانێ كارتێكرنا ل سەر ئاستێ یانەیان نابنە ئاستەنگێن مەزن و چو كارتێكرنەكا نەرێنی ل سەر پلانێن مە یێن نینە، رەوشا نوكە یا هەستیارە و ئەم هەموو پێكڤە ب ئێگكرتن بۆ پاراستنا كوردستانا مە ئێك دەنگ و دلین و سلامەتییا یاریزانان بۆ مە گرنگترە ژ ئەنجامدانا خولێ.
ژلایەكێ دووڤە ناڤبری گۆتژی: دیتنا یاریزانێن خودان شیان نوكە ب ساناهیتر كەفتیە، ژبەركو زۆربەیا یاریزانێن نایاب و پلە ئێك د خولێن كوردستانێ و ئیراقێ دا پشكدار بووینە و ئەڤ چەندە رێكێ بۆ یانەیێن دی خوەش دكەت كو یاریزانێن گونجای بۆ رێزێن خۆ دابین بكەن.
زەهدی عەبدولقادر گۆت: بۆ دابینكرنا مووچە و پێدڤیێن یاریزانێن خۆ، نەچار بووینە پەنایێ بۆ قەرا ببەین ئەو داهاتێ هەی تێرا مەزاختنا یانەیێ ناكەت و پێشبینی دكەین هەتا دووماهیا خولێ ئەم نەچار ببین هێشتا پاران قەر بكەین دا كو بشێین كارێن یانەیێ ب ڕێ ڤە ببەین، ئەڤ چەندە بوویە ئەگەر كو یانە ب زەحمەت بشێن ئەركێن خۆ یێن دارایی بەرامبەر یاریزان و ستافێن هونەری جێبەجێ بكەن.
