زەیتا ڤێ هەیڤێ دێ گیرۆبیت
سندس سالح سلێڤانەیی:
پتریا خەلكێ دهۆكێ گازندەیان ژ وێ چەندێ دكەن ئەڤە نێزیكی دو هەیڤانە وان (زەیت) وەكو بەهرا خۆ یا هەیڤانە نەوەرگرتی و بریكارەكێ ئاهێن خوارنێ ژی دبێژیت: گەلەك خەلك كەرەستەیێن دی ژی وەك (برنج و شەكر و نیسك و نوك) و تشتێن دی ژی نابەن و دبێژن ئەم یێ ل هیڤیا زەیتێ و رێڤەبەرێ ئاهێن خوارنێ ل دهۆكێ دبێژیت: ئەگەرێ نەهاتنا زەیتێ بۆ كاودانێن نوكە یێن ئیراقێ دزڤڕیت، لەورا ئەز دخوازم خەلك بچیت ئەرزاقێ خۆ وەربگریت، چنكو (زەیت) دێ گیرۆبیت.
مستەفا سالم، وەك وەلاتیەك دبێژیت: ئەڤە دو هەیڤە مە بەهرا خۆ ژ زەیتێ نەوەرگرتی و چەند جارەكێ پرسیارا بریكارێ خۆ یێ ئەرزاقی بكەم دێ بێژیت ژ بەغدا نەهاتیە و نەهاتن یان گیرۆكرنا وێ گەلەك كارتێكرن ل مە كریە وەك خێزانێن كێم دەرامەت و بێ مووچە، چنكو ئەو زەیتا د هات هەر چاوا بیت مە بۆ خۆ پێ د قەتاند و تێرا هەیڤەكێ دكر، لێ نوكە ئەو ژی ناهێت و بهایێ هەر بوتلەكێ زەیتێ ل بازاڕی گەهشتیە 2750 دیناران و ئەڤە ژی بۆمە بارەكێ گرانە و د شیانێن مەدا نینە بكڕین.
موحسن، بریكارێ وی یێ ئاهێن خوارنێ یە، گۆت: ئەو كەسێن ئەرزاقی ژ دەف من وەردگرتن پتریا وان خێزانێن دەستكورت و هەژارن و هندەك ژ وان رۆژانە دهێن دبێژن (زەیت) هاتیە، ئەز دبێژم نەخێر ئەو گەلەك پێ تێكدچن و دزڤڕن و هندەك ژی تشتێ دی ژی نابەن و دبێژن (زەیت) كەرەستەیەكێ سەرەكی و ژ هەموو ئەرزاقی بتنێ ئەو یا باشە و ئەم نوكە نەشێین تەكسیەكێ بۆ ڤان تشتێن هاتین بگرین و دەمێ (زەیت) دهێت بچین ئێكا دی ژی بگرین و هیڤیا مە ئەوە بەری چەژنێ ئەو ژی بهێت.
هەجەر تاهر، رێڤەبەرێ بەلاڤكرنا ئاهێن خوارنێ ل دهۆكێ دبێژیت: راستە هاتنا زەیتێ گەلەك گیرۆبوو، ب تایبەت دڤێ هەیڤێ دا و نوكە چ (زەیت) د عۆمبارێن مە دا نینە، لێ ئەم ل گەل بەغدا د پەیوەندیێن بەردەوام داینە و ئەو ژی دبێژن ژبەر ئالۆزیێن شەڕێ ئەمریكا و ئسرائیلێ ل گەل ئیرانێ بەرهەمئینانا زەیتێ ل كارگەهێن ئیراقێ گەلەك ل كێمیێ دا یە و ئێدی وان ئەو شیان نەماینە وەكو بەرێ زەیتێ بەرهەم بینن و نوكە دبێژن ل دووف وێ زەیتا بەرهەم دئینین دێ وەكو سرا دەینە هەموو پارێزگەهێن ئیراقێ و رەنگە هەر چەند رۆژان جارەكێ ترۆمبێلەك بگەهیتە مە و ئەم ژی ئێكسەر دێ ل سەر بریكارێن خۆ بەلاڤكەین دا ئەو ژی بدەنە خەلكی، لێ ئەز داخوازێ ژ خەلكێ مە دكەم بچن بەهرا خۆ یا ئەرزاقی وەربگرن هەتا زەیت دهێت باشی بچن وێ ژی وەربگرن، چونكو رەنگە هاتنا وێ گیرۆتر لێ بهێت.
