ساخله‌میا دهۆكێ به‌رهه‌ڤیێن پێشكێشكرنا خزمه‌تێن ساخله‌میێ بۆ ئاواران دكه‌ت
دهۆك، له‌زگین جوقی:
رێڤه‌به‌رێ گشتی یێ ساخله‌میا پارێزگه‌ها دهۆكێ بۆ رۆژناما ئه‌ڤرۆ دیار كر، ئه‌و ل گه‌ل رێڤه‌به‌ریێن ساخله‌میێ ل ده‌ڤه‌رداریێن به‌رده‌ڕه‌ش و زاخۆ و ئاكرێ و شێخان و سێمێل و رێكخراوێن پشته‌ڤانیا بنگه‌هێن ساخله‌میێ د ناڤ كه‌مپێن ئاواره و په‌نابه‌ران دا پێكڤه به‌رهه‌ڤیان دكه‌ن، كو به‌رده‌وام خزمه‌تێن ساخله‌میێ بۆ ئاواره و په‌نابه‌ران پێشكێش بكه‌ن.
د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ د كۆمبوونه‌كێ دا ل گه‌ل رێكخراوێن پشته‌ڤانیا بنگه‌هێن ساخله‌میێ دكه‌ن راگه‌هاند: “دبیت هنده‌ك رێكخراو ل دووماهیا ئه‌ڤ ساله خوه ژ خزمه‌تكرنا ئاواره و په‌نابه‌ران ڤه‌كێشن و گرێبه‌ستێن هنده‌ك رێكخراوێن دی ژی هه‌تا هه‌یڤا شه‌ش یا سالا بهێـت دێ ب دووماهی هێن، له‌و ئه‌م وه‌كو ساخله‌میا پارێزگه‌ها دهۆكێ ب نڤیساره‌كا فه‌رمی دێ هه‌موو لایه‌نێن په‌یوه‌ندیدار ل سه‌ر كارێ رێكخراوان ئاگه‌هدار كه‌ین و به‌رده‌وام دێ خزمه‌تێن ساخله‌میێ پێشكێشی ئاواره و په‌نابه‌ران د ناڤ كه‌مپان دا كه‌ین”.
ناڤهاتی گۆت: “ب مه‌ره‌ما خوه به‌رهه‌ڤكرن بۆ سالا 2023ێ و به‌رده‌وامی دان ب پێشكێشكرنا خزمه‌تین ساخله‌میێ د ناڤ كه‌مپێن ئاواره و په‌نابه‌ران دا، دوهی مه گه‌نگه‌شه ل گه‌ل رێكخراوان كر و ئه‌م هیڤیدارین ل سه‌ر كارێ خوه د ناڤ كه‌مپان دا به‌رده‌وام بن، چونكو هێشتا گه‌له‌ك ئاواره و په‌نابه‌ر ل سنوورێ پارێزگه‌ها دهۆكێ ماینه و پیدڤی ب خزمه‌تێن ساخله‌میێ نه”.
