ساخله‌میا دهۆكێ ده‌ست ب دانانا ڤاكسینا كۆرۆنایێ بێ سرا كر
دهۆك، له‌زگین و نه‌وزاد:
به‌رپرسێ راگه‌هاندنا رێڤه‌به‌ریا گشتی یا ساخله‌میا پارێزگه‌ها دهۆكێ دیار كر، ژ نوكه وێڤه وه‌رگرتنا ڤاكسینا دژی كۆرۆنایێ ل پارێزگه‌ها دهۆكێ دێ بیته تۆماركرنا راسته‌وخۆ هه‌ر كه‌سه‌كێ بڤێت ڤاكسینێ وه‌ربگریت، دشێت راسته‌وخۆ سه‌ره‌دانا بنگه‌هێن ڤاكسیندانێ بكه‌ت و ئێكسه‌ر ڤاكسینێ وه‌ربگریت.
حه‌مزه ره‌زیكی، به‌رپرسێ راگه‌هاندنا رێڤه‌به‌ریا گشتی یا ساخله‌میا پارێزگه‌ها دهۆكێ بۆ رۆژناما ئه‌ڤرۆ گۆت: “هه‌ر وه‌لاتیه‌كێ بڤێت ڤاكسینا دژی كۆرۆنایێ وه‌ربگریت، دشێت راسته‌وخۆ بچته بنگه‌هێن ڤاكسیندانانێ بۆ وه‌رگرتنا ڤاكسینێ، ئه‌و كه‌سێ بڤێت بچیت ڤاكسینێ ب دانیت، ب تنێ پێدڤیه ناسنامه‌یا بارێ شارستانی یان پاسپۆرتێ دگه‌ل خوه ببه‌ت و قه‌ستا نێزیكترین بنگه‌هێ ڤاكسیندانانێ بكه‌ت بۆ وه‌رگرتنا ڤاكسینێ، راسته‌وخۆ دێ هێنه تۆماركرن و ڤاكسین بۆ هێته دانان”.
به‌رپرسێ راگه‌هاندنا رێڤه‌به‌ریا گشتی یا ساخله‌میا پارێزگه‌ها دهۆكێ گۆتژی: “ل نه‌خۆشخانا گولان یا ئاكرێ و سێمێلێ و نه‌خۆشحانا ئازادی ل دهۆكێ ڤاكسین ل دانێ ئێڤاریان نامینیت، هه‌ر كه‌سه‌كێ ژڤانێ وه‌رگرتنا قۆرچێن ئێكی و دویێ ژی هه‌بیت دێ سپێده‌هیان وه‌رگریت، ئێدی ئێڤاریان ڤاكسینا كۆرۆنایێ ناهێته دانان و ب تنێ دێ ل سپێده‌هیان هێته دانان”.
ل پارێزگه‌ها دهۆكێ هه‌تا نوكه 339 هزار قۆرچێن ڤاكسینا دژی كۆرۆنایێ بۆ كه‌سێن د سه‌ر ژییێ 18 سالی دا هاتینه دانان.
ژلایه‌كێ دیڤه ئه‌رشه‌د مسته‌فا، رێڤه‌به‌رێ بنگه‌هێ نزاركێ یێ ساخله‌میێ بۆ رۆژناما ئه‌ڤرۆ گۆت: “پێشتر هه‌ر كه‌سێ ڤاكسین دانابا دڤیا ب رێیا مالپه‌ره‌كێ ئه‌لكترۆنی ناڤێ خوه تۆماركربا، به‌لێ ژ ئه‌ڤرۆ وێڤه هه‌ركه‌سێ بخوازیت ڤاكسینێ بدانیت، دشێت سه‌ره‌دانا هه‌ر بنگه‌هه‌كێ ساخه‌میێ ل سنوورێ پارێزگه‌ها دهۆكێ بكه‌ت بۆ دانانا ڤاكسینێ”.
ئه‌رشه‌د زێده‌تر گۆت: “ئه‌ڤ بڕیاره دێ بیته ئه‌گه‌ر كو پتر وه‌لاتی قه‌ستا بنگه‌هێن دانانا ڤاكسینێ بكه‌ن و ئه‌م باوه‌رین دێ رێژه گه‌له‌ك زێده بیت، دیسا چه‌ند وه‌لاتی ڤاكسینێ بدانن دێ رێژا تووشبوونێ ژی كێمتر لێهێت”.
