ساخله‌میا دهۆكێ: رێژا تووشبوویێن كۆرۆنایێ بۆ 6% كێمبوویه
ئه‌ڤرۆ، له‌زگین جوقی:
به‌رپرسێ راگه‌هاندنا رێڤه‌به‌ریا گشتی ساخله‌میا پارێزگه‌ها دهۆكێ راگه‌هاند: رێژا تووشبوویێن كورۆنایێ ل دهۆكێ به‌ره‌ڤ كیمبوونێ یه، هه‌كه به‌رێ نوكه 250 نه‌خۆش ناڤ نه‌خۆشخانه‌یێن دهۆكێ دا هه‌بن نوكه بووینه 50 نه‌خۆش، ئانكو ژ 100 پشكنینان 15 كه‌س تووشی كۆرۆنایێ دبوون، لێ نوكه ئه‌ڤ رێژه بۆ 6% كێمبوویه.
حه‌مزه محه‌مه‌د عه‌لی، به‌رپرسێ راگه‌هاندنێ ل رێڤه‌به‌ریا گشتی ساخله‌میا پارێزگه‌ها دهۆكێ بۆ ئه‌ڤرۆ دیار كر: به‌ری نوكه رێژا تووشبوویێن كۆرۆنایێ ل دهۆكێ 15% بوو، لێ نوكه ئه‌ڤ رێژا تووشبوویان گه‌له‌ك كێمبوویه و گه‌هشتیه 6%، ئه‌ڤه ژی ڤه‌دگه‌ریت بۆ رێكارێن به‌رهه‌نگاریا كۆرۆنایێ و پێگیریا وه‌لاتیان و دانانا ڤاكسینێ دژی كۆرۆنایێ ژلایێ وه‌لاتیان ڤه. هه‌روه‌سا ژی گه‌له‌ك ژ وه‌لاتیان تووشی كۆرۆنایێ بووینه و به‌رگری بۆ لاشێ وان چێبوویه، داخواز دكه‌ین وه‌لاتی به‌رده‌وام بن ل سه‌ر رێكارین خۆ پاراستنێ ژ ڤایرۆسێ كۆرۆنایێ.
به‌رپرسێ راگه‌هاندنێ ل رێڤه‌به‌ریا گشتیا ساخله‌میا پارێزگه‌ها دهۆكێ گۆت ژی:” هه‌ر كه‌سه‌كێ هه‌تا نوكه ڤاكسین نه وه‌رگرتی دخوازین قه‌ستا بنگه‌هێن ڤاكسیندانێ بكه‌ن، بۆ وێ چه‌ندێ ژیانا خۆ و خێزانا خۆ بپارێزن. هه‌تا نوكه ڤاكسین تاكه رێكه بۆ به‌رهه‌نگاریا كۆرۆنایێ و ساخله‌میا پارێزگه‌ها دهۆكێ تیمێن ڤاكسیندانێ زێده‌كرینه، نوكه وه‌لاتێ دشێن بێ خۆ تۆماركرن ژ ڤاكسینی ئێكسه‌ر وه‌ربگرن، ب تنێ ناسنامه‌یا خۆ ل گه‌ل خۆ ببه‌ن قه‌ستا جهێن ڤاكسیندانێ بكه‌ن دێ ڤاكسینێ وه‌رگرن.
د. سه‌كڤان حه‌سه‌ن، به‌رپرسێ هوبا نه‌خۆشیێن ڤه‌گر ل ساخله‌میا پارێزگه‌ها دهۆكێ بۆ دیار كر: وه‌رگرتنا قورچا سیێ یا ڤاكسینێ كۆرۆنایێ به‌رگریا له‌شێ مرۆڤی بۆ به‌رهه‌نگاریا هه‌موو جۆرێن ڤایرۆسێ كۆرۆنایێ بهێز دكه‌ت هه‌تا ژی هه‌ر كه‌سه‌كێ قورچا سیێ وه‌ربگریت بۆ به‌رهه‌نگاریا ئومیكرون ژی به‌رگری بۆ دروست بیت، له‌ورا ئه‌م خه‌لكێ خۆ هاندده‌ین قورچا سیێ یا ڤاكسینێ كورۆنایێ وه‌ربگرن، هه‌ر كه‌سه‌كێ دوو قورچا وه‌رگرت بن، پشتی شه‌ش هه‌یڤان دشێت قورچا سیێ وه‌ربگریت”.
حه‌مزه محه‌مه‌د عه‌لی، به‌رپرسێ راگه‌هاندنێ ل رێڤه‌به‌ریا گشتی ساخله‌میا پارێزگه‌ها دهۆكێ ئه‌و ژی دیار كر: “نوكه ساخله‌میا دهۆكێ خۆ به‌رهه‌ڤ دكه‌ت بۆ به‌رهه‌نگاریا هه‌ر پێشهاته‌كا رووبده‌ت د وارێ ساخله‌میێ دا، بۆ ڤێ مه‌به‌ستێ ژی دگه‌ل ساخله‌میا جیهانێ گه‌نگه‌شه ل سه‌ر خۆ ئاماده‌كرنێ بۆ حاله‌تێن ته‌نگاڤییان و قه‌یرانێن ساخله‌میێ و هه‌ڤركیێ دكه‌ڤنه د رێكێ دا و پێدڤیێن ساخله‌میێ بۆ به‌رهه‌نگاربوونا كۆرۆنایێ.
