ساخله‌میا دهۆكێ 30 تیم بۆ پێشهاتێن چاڤه‌ڕێ نه‌كری پێكئینان
دهۆك، له‌زگین جوقی
ب سه‌رپه‌رشتیا د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ 30 تیم بۆ به‌رهه‌نگاریا هه‌ر پێشهاته‌كا چاڤه‌ڕێ نه‌كری هاتنه پێكئینان.
د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ بۆ رۆژناما ئه‌ڤرۆ دیار كر كو ساخله‌میا پاریسَزگه‌ها دهۆكێ ئاماده‌یا خوه بۆ هه‌ر هاریكاریه‌كێ بۆ پارێزگه‌ها هه‌ولێرێ دیاركریه و گۆت: “مه بۆ هاریكاریكرنا وه‌لاتیان د ده‌مێ په‌یدابوونا له‌هیان دا به‌رهه‌ڤی كرینه و 30 تیم هاتینه پێكئینان دگه‌ل چار تیمێن ته‌نگاڤیان و 24 ده‌مژمێران تیمێن ساخله‌میێ دێ د ئاماده‌باشیێ دا بن، ل ده‌مێ په‌یدابوه‌نا هه‌ر پێشهاته‌كا چاڤه‌رێ نه‌كری ئه‌م به‌رهه‌ڤین بۆ خزمه‌تكرنا وه‌لاتیان ل سنوورێ پارێزگه‌هێ”.
ئیسماعیل مسته‌فا، به‌رپرسێ راگه‌هاندنێ ل سه‌رۆكاتیا باژێرڤانیا دهۆكێ دیار كر، پشتی بارینا وێ ریژا بارانێ ل دهۆكێ، تیمێن پشكا دووڤچوونا باژێڕی ل دهۆكێ هه‌وه‌كا پاقژیێ ئه‌نجامدان و گۆت: “ده‌ست ب پاقژكرنا ئاڤرێژان هاتیه كرن، ئه‌و به‌رمایكێن له‌هیێن بارانان هه‌موو دێ هێنه پاقژكرن، داكو زیانێن گیانی ژێ په‌یدا نه‌بن و سامانێ وه‌لاتیان یێ پاراستی بیت، ل دهۆكێ چو روودان چێ نه‌بووینه، لێ ئاڤ ل هنده‌ك جهان مایه، ئه‌و ژی هاتیه پاقژكرن و نوكه ئاڤرێژ ژی ژ به‌رمایكان دهێنه پاقژكرن”.
ئیسماعیلی گۆتژی:”تیمێن باژێرڤانیێ ب هه‌ڤكاری دگه‌ل رێڤه‌به‌ریا سولینان و به‌رگریا شارستانی بۆ ده‌مێ 24 ده‌مژمێران د كاری دانه و هه‌موو تیم د ئاماده‌باشیێ دانه”.
بێوار عه‌بدولعه‌زیز، په‌یڤدارێ رێڤه‌به‌ریا به‌ره‌ڤانیا باژێری ل دهۆكێ بۆ ئه‌ڤرۆ دیار كر، هه‌موو تیمێن به‌ره‌ڤانیا باژێری ل دهۆكێ ژ به‌ر بارینا بارانێن بهێز كه‌فتینه د ئاماده‌باشێ دا، دیسا بۆ به‌رهه‌نگاریا هه‌ر پێشهاته‌كا چاڤه‌رێ نه‌كری وه‌لاتی دشێن په‌یوه‌ندیێ ب هه‌ژمار 115 بكه‌ن.
