ساخلەمیا دهۆكێ چەندین رێنماییێن نوو بۆ خوارنگەهێن دهۆكێ دەرئێخستن
دهۆك، لەزگین جۆقی:
رێڤەبەریا گشتییا ساخلەمیا پارێزگەها دهۆكێ راگەهاند، چاڤدێری ل سەر هەمی خوارنگەهان توند بوویە و رێنمایێن نوو بۆ هەمی خوارنگەهان دەركەفتینە، پێدڤیە كەرستێ مایونیز ب چەندەكا كێم و رۆژانە بهێتە ئامادەكرن و د ناڤ تەزیكەران دا بهێتە هەلگرتن.
مەتین جەمیل، بەرپرسێ راگەهاندنا رێڤەبەریا گشتییا ساخلەمیا پارێزگەها دهۆكێ بۆ رۆژناما ئەڤرۆ خویا كر، پێدڤیە هەمی خوارنگەهێن دهۆكێ شیشكێن گوشتی و مریشكا و كەبابێ ب شیوەیەكێ ئێكڕیزی بدانن و نابیت ل سەر ئێك بهێنە دانان و باجانسۆر یان هەر كەسكاتیەكێ دی نابیت د سێنیا گەسێ دا بهێنە دانان، بەلكو دڤێت د ئامانەكێ تایبەت دا بن و دوور بن ژ ئاگری.
ناڤهاتی گۆت: «دڤێت كەسكاتی ب رەنگەكێ باش بهێتە شووشتن ب ڕێكا پەرمەنگەناتی پوتاسیۆم و خوێ، پێدڤیە سرك ل سەر هەمی مێزێن خوارنێ بهێتە دانان و نابیت ب هیچ شێوەیەكی تەزیكەر ل خوارنگەهان بهێنە ڤەمراندن».
زێدەتر گۆت: «كرێكار دڤێت دەستێن خۆ باش بشوون و جلكێن پاقژ ل بەر بن ل دەمێ كاری، گوشتێ شیشدایی نابیت ل گەل گوشتێ فرێش د ئێك تەزیكەر دا بهێتە هەلگرتن».
