ساخلەمی ل دۆر بەلاڤبوونا ڤایرۆسێ کرۆنا ھایداریێ ددەت
ئەڤرۆ نيوز:
وەزارەتا ساخلەمیێ ل حوکمەتا ھەرێما کوردستانێ دەربارەی بەلاڤبوونا ڤایرۆسێ کرۆنا د ناڤ حەجیێن ھەرێما کوردستانێ دا ھایداریێ ددەت، پەیڤدارێ وەزارەتێ ژی دبێژیت: پشکنین بۆ ھەموو حەجیان دێ ھێنە کرن، ھەر حەجیەکێ پلا گەرما لەشێ وی یا بلند بیت گۆمان لێ ھێتە کرن تووشی ڤایرۆسێ کرۆنا ببیت.
د. خالس قادر، پەیڤدارێ وەزارەتا ساخلەمیێ ل حوکمەتا ھەرێما کوردستانێ ئاشکرا کر، ب مەرەما خوەپاراستن و رێگریکرنێ ل بەلاڤبوونا ڤایرۆسێ کرۆنا، ل ھەردو فرۆکخانێن نێڤدەولەتی یێن ھەولێر و سلێمانیێ تیمێن نۆشداری لێ ھاتینە ئامادەکرن و بۆ SNN گۆت: “ھەموو ئەو حەجیێن ھەرێما کوردستانێ یێن ژ وەلاتێ سعودیێ ڤەدگەرن ب رێیا ئامیرێ (پیڤەرێ گەرمێ) پشکنین دێ بۆ ھێنە کرن ھەر حەجیەکێ پلا گەرما لەشێ وی یا بلند بیت گۆمان لێ ھێتە کرن تووشی ڤایرۆسێ کرۆنا ببیت”.
خویا ژی کر، ژ بەر کو ڤایرۆسێ کرۆنا ل وەلاتێ سعودیێ ھەیە و ھەتا نوکە نەھاتیە کونترۆلکرن، لەو مەترسی ل سەر حەجیێن ھەرێمێ یا ھەی.
دەربارەی وان رێیێن وەزارەتا ساخلەمیێ بۆ رێگریکرنێ ل بەلاڤبوونا وی ڤایرۆسی گرتینە بەر، دکتور خالس گۆت: “رێیێن پێدڤی ھەمبەر حەجیان دێ گرینە بەر، ھەر گۆمانەک ژی ھەبیت راستەوخۆ ب رێیا تیمێن نۆشداری دێ دووڤچوونێ بۆ کەین”.
رۆژا دوشەمبی ٢٨-٩-٢٠١٥ کاروانێ ئێکێ یێ حەجیێن ھەرێما کوردستانێ کو ٤٢٠ حەجی بوون، ب رێیا ھەردو فرۆکخانێن نێڤدەولەتی یێن ھەولێر و سلێمانیێ ڤەگەریان، ژڤانە ئەڤرۆ ژی ٣٠-٩-٢٠١٥ کاروانێ ئێکێ یێ حەجیێن پارێزدەھا دھۆکێ ڤەگەرن.
