سالانه ل دهۆكێ نێزیكی 30 مه‌حفیرێن خومالی دهێنه به‌رهه‌مئینان
ئه‌ڤرۆ، هه‌رهین محه‌مه‌د:
هه‌ر ژ كه‌ڤن دا مه‌حفیرا ب ده‌ستی هاتبا دروستكرن ژ سوفی و هریێ بهایێ خۆ هه‌بوویه و گه‌له‌ك ده‌م دچوو هه‌تا دهاته دروستكرن و ژ دارڤه‌كرن. هاریكارا رێڤه‌به‌را بنگه‌هێ مه‌حفیرێن ده‌ستی ژی دیاركه‌ت كو سالانه ل بنگه‌هێ وان نێزیكی 30 مه‌حفیرێن مه‌زن دهێنه چێكرن ژبلی یێن بچویك یێن دیواری و پارێ وان دهێنه ڤه گۆهاستن بۆ گه‌نجینا دهۆكێ.
سه‌میرا مه‌حمود، هاریكارا رێڤه‌به‌را بنگه‌هێ مه‌حفیرێن ده‌ستی یا ب سه‌ر رێڤه‌به‌ریا گشتی یا ره‌وشه‌نبیری و هونه‌ری ل دهۆكێ گۆت: ل سالێن هه‌شتێیان ئه‌ڤ به‌شه هاتیه دامه‌زراندن و مه گه‌له‌ك خزمه‌ت كریه، چونكو ئه‌و مه‌حفیرێن ئه‌م چێدكه‌ین ژ ژیوارێ مه‌یه، ئانكو فلكلوری نه و ئه‌م ده‌ربرینێ ژێ دكه‌ین ب پارچه مه‌حفیره‌كێ و ئه‌و مه‌حفیره دهێته هه‌لاویستن.
زێده‌تر گۆت: به‌ری نوكه مه مه‌حفیرێن مه‌زن ژی چێدكرن، به‌لێ ب بورینا ده‌می حه‌زا خه‌لكی كه‌فته سه‌ر مه‌حفیرێن بچویك بۆ هه‌لاویستنێ و هه‌كه خه‌لك داخاز بكه‌ن ئه‌م ل دویڤ داخازیا وان مه حفیرا دروستكه‌ین، ب هه‌موو قه‌بارا و دیزاینا و دیزاینا هه‌ر مه‌حفیره‌كی نێزیكه حه‌فتیه‌كێ ل سه‌ر كاردكه‌ین و بۆ چێكرنا مه‌حفیرێ ژی هه‌یڤه‌ك بۆ دڤێت هه‌تا ب دووماهی دهێت. ده‌زیێ ڤان مه‌حفیران ژی ئاماده بۆ مه دهێت و هه‌ر ده‌زیه‌كێ د دیزاینه‌كێ دا ئه‌م پێدڤی دبین ئه‌م ژ رێڤه‌به‌ریا خوه داخازدكه‌ین و ئه‌و بۆ مه دئینن.
هاریكارا، رێڤه‌به‌را بنگه‌هێ مه‌حفیرێن ده‌ستی هێشتا گۆت ژی: هه‌ر مه‌حفیره‌كا ئه‌م دروستكه‌ین ئه‌م قه‌باره و بهایێ وێ د دانین بۆ رێڤه‌به‌ریا مه و ئه‌و ژی دهنێرنه گه‌نجینا دهۆكێ، ئانكو هه‌ر بۆ حكومه‌تێ دزڤریت نه‌كو بۆ كارمه‌ندان، چونكو حكومیه و گه‌له‌ك كه‌س ژ خه‌لكێ مه دكرن و بۆ خوه دبه‌نه ده‌رڤه‌ی وه‌لاتی و دیسان هنده‌ك جاران بۆ هنده‌ك كه‌سان دبه‌ن بۆ ده‌رڤه‌ی وه‌لاتی وه‌كو دیاری دا فلكلۆرێ مه نیشا وان بده‌ن. مه دیزاینه‌ر هه‌نه و ئه‌و دیزاینان ددانن و ئه‌م ژی هاریكارین ل گه‌ل و هه‌روه‌سان مفای ژ ئه‌نترنێتێ ژی دبینن و پتریا وان ژی ژ كه‌توارێ مه‌نه وه‌كو ژینگه‌ه زوو تشتێن ئاینی و پارزینك و مه‌شكێ و پتر گرنگیێ ب فلكوری و سالانه نێزیكی 20 هه‌تا 30 مه‌حفیران ئه‌م دروستكه‌ین و ئه‌ڤه كارێ مه یه دڤێت ئه‌م چێكه‌ین و خوه هه‌كه داخازی نه‌بن ژی.
سه‌میرایێ گۆت: بنگه‌هێ مه هه‌ر ژ ده‌ستپێكێ هه‌تا نوكه گه‌له‌ك كه‌س ل نك مه هاتینه خانه‌شینكرن و وه‌غه‌ركرینه و گه‌له‌كان ژی ل ده‌ڤ مه هێلایه و بۆ خوه كاره‌كێ دی كربیت و د كاری دا و دیسان ئاڤاهیێ مه گه‌له‌ك یێ كه‌ڤنه و راسته یێ فره‌هه و هاتیه نووژه‌نكرن، به‌لێ هه‌ر یێ كه‌ڤنه و پێدڤیه بهێته گۆهارتن، یان دووباره بهێته ئاڤاكرن.
